.

இந்தியக் குடியரசும்...வல்லரசுக் கனவும்...! ஒரு விழிப்புணர்வு பார்வை...!

2012-01-26T08:13:00.005+05:30

இந்திய குடியரசின் ஒப்பற்ற நாளை விழாவாக கொண்டாடிக்கொண்டிருக்கும் அத்தனை தோழர்களுக்கும் வாழ்த்துக்களை கழுகு தெரிவித்துக் கொள்கிறது.

உலகிலேயே மிகப்பெரிய ஜனநாயக நாடு என்ற அடைமொழியோடு வல்லரசு பட்டத்தை தனது தோள்பட்டையில் தானாகவே குத்திக் கொண்டு மீண்டும் மீண்டும் தன்னை வல்லரசாக பார்க்கச் சொல்லி இந்திய தேசத்தின் மக்களை மூளைச் சலவை செய்து கொண்டிருக்கும் இதுவரை இந்தியாவை ஆண்ட, தற்போது ஆண்டு கொண்டிருக்கும் அரசியல் கட்சிகளுக்கு எல்லாம் ஒரு இந்தியக் குடிமகனாக கடும் கண்டனத்தை இந்த 63 ஆம் குடியரசு தினத்தில் தெரிவிக்கும் கடமை நமக்கு உள்ளதையும் மறக்க வேண்டாம் தோழர்கள்..!

17 ஆம் நூற்றாண்டில் இந்தியாவில் வணிகம் செய்ய வந்த ஆங்கிலேயனும், டச்சுக்காரனும், பிரெஞ்சுக்காரனும் மென்று தின்றது போக மீதமுள்ள நாட்டை நாங்கள் போராடித்தான் சுதந்திரம் பெற்றோமென்று இந்திய வரலாறு எழுதப்பட்டதிலிருந்து ஆரம்பிக்கிறது இந்திய அரசியல்கட்சிகளின் ஆக்கிரமிப்பு... அரசியல்வாதிகளின் சூழ்ச்சி. இந்திய சுதந்திரத்துக்கு மக்கள் போராடியதும் கஷ்டங்களை அனுபவித்ததும் எவ்வளவு உண்மையோ அவ்வளவு உண்மை ஆங்கிலேயனால் நிர்வாகம் செய்ய முடியாமல் சுதந்திரம் என்ற ஒரு மாயா விடுதலையை அவர்கள் விட்டுகொடுத்து சென்றதும்.

இந்தியா பாகிஸ்தான் பிரிவினை.. காலத்தின் கட்டாயமாகிப் போனதை மகாத்மா அறிந்திருந்தார். காழ்ப்புணர்ச்சி மதவாத அரசியலைக் கண்டு சகிக்க முடியாத ஒரு தேச நலவிரும்பியாய் இருந்த தேசப்பிதாவால், சுதந்திர இந்தியாவின் எந்த பதவிப் பொறுப்பையும் ஏற்க முடியவில்லை. தன்முனைப்பினைக் கொண்டிருந்த நேருவால் முதல் பிரதமர் பதவியை விட்டுக் கொடுக்க முடியவில்லையாதலால் தீர்க்கமாக தேசப்பிதா எடுத்த முடிவுதான் இந்தியா பாகிஸ்தான் பிரிவினைக்கு வித்திட்டது.

காலத்தின் வீச்சில் இந்தியாவின் சக்கரங்கள் உருண்டோடி, உருண்டோடி, அதன் மிகுதியான பக்கங்களை தேசிய அளவிலும், மாநில அளவிலும் ஆண்ட ஒரு பெரும் கட்சியாக விசுவரூபமெடுத்து நிற்பது காங்கிரஸ் மட்டுமே...! சுதந்திர இந்தியாவில் காங்கிரஸ் என்னும் கட்சி முன்னெடுத்த ஜனநாயகமும் பொருளாதாரக் கொள்கைகளும், பிராந்திய மக்களை நடத்திய விதமும், பிராந்திய கட்சிகளோடு கூட்டு சேர்ந்து முன்னெடுத்த திட்டங்களும் சேர்ந்துதான் இன்றைய இந்தியாவின் எல்லாவிதமான சமூக சூழல்களுக்கும் காரணியாய் ஆகியிருக்கிறது என்பதை யாரும் மறுத்தல் ஆகாது.

அகில இந்திய அரசியலில் இன்றைய தேதிக்கு காங்கிரஸ் என்னும் பெரும் கட்சிக்கு மாற்றாய் அறியப்படும் பாரதிய ஜனதாவின் அடிப்படைக் கொள்கைகள் இந்தியா என்னும் பன்முகப்பட்ட மக்களைக் கொண்டிருக்கும் மனிதர்களின் ஒற்றுமைக்கு சர்வ நிச்சயமாய் ஊறு விளைவிக்க கூடியதுதான். ஆர்.எஸ்.எஸை தனது ஆணிவேராக கொண்டிருக்கும் இந்தக் கட்சியின் அகண்டபாரதக் கொள்கையும், இந்து நாடு கொள்கையும் ஒரு வேளை இந்தக் கட்சி தேசம் முழுதும் வலுவாய் காலூன்றினால் ஒரு சர்வாகாதிகாரமாகவே தேசம் முழுமைக்கும் அறிமுகம் செய்யப்படும் அபாயமுமிருக்கிறது.

பல சாதி அடிப்படைகள் கொண்ட இந்தியாவில் கம்யூனிஸ்டுகள் இறக்குமதி செய்த கம்யூனிசம் வேரூன்ற முடியாததற்கு காரணம் வர்க்க போராட்டங்களையும் அதன் கொடுமைகளையும் தாண்டிய நுணுக்கமான மனிதவள சங்கடங்களை அவர்களால் அணுகமுடியாததுதான். அடிமட்டத்தில் இருக்கும் மனிதர்களின் பொருளாதர ரீதியான பலவீனங்களையும், அடக்கு முறைகளையும் ஆராய்ந்து அதற்கான தீர்வுகளை சொல்ல முனைந்த கம்னியூஸ்ட்டுகளுக்கு இன ரீதியான அடக்கு முறையை எப்படி எதிர்கொள்வது என்று தெரியாமலேயே போனது...

இந்திய தேசத்தில் காங்கிரசுக்கு மாற்றாக எந்த ஒரு கட்சியும் தேசம் முழுதும் வியாபித்து நிற்க முடியாத வகையில் போனதற்கு காங்கிரசின் மேம்போக்கான கவர்ச்சிகர கொள்கைகளும், தேச விடுதலைப் போராட்ட அக்மார்க் முத்திரைகளும் காரணமாக இருந்ததால், இன்று வரை ஒரு பாமர இந்தியனால் சுதந்திரத்துக்குப் போரடிய இந்திய தேசிய காங்கிரசுக்கும், இந்தியாவை ஆளும் அரசியல் கட்சியான காங்கிரசுக்கும் இடையே இருக்கும் வித்தியாசம் தெரியாமலேயே போனது....

இதுதான் காங்கிரஸ் கட்சியின் உச்ச பட்ச சாணக்கியத்தனம். சுதந்திரப் போராட்டத்தில் பயன்படுத்திய காங்கிரஸ் கொடியில் இராட்டையை எடுத்து விட்டு.... அதில் அசோக சக்கரம் பொருத்தி இந்தியாவின் சுதந்திரக் கொடியாய் அறிவித்த காங்கிரஸ் பெரும் தலைகள் அதே வர்ணத்தில் தனது கட்சியின் கொடியையும் வைத்துக் கொண்டு நடுவில் கைச் சின்னத்தை பொறித்து சாமார்த்தியமாய் தன்னை தேசத்தின் மிகப்பெரிய சக்தியாய் முடிச்சிட்டுக் கொண்டது.

கடந்த 62 வருட இந்திய குடியரசு எதையும் சாதித்து விடவில்லை என்பதை நீங்கள் தெளிவாக உணர்வீர்களாக; எந்த மாநிலத்துக்கு இடையேயும் சுமூக உறவுகள் கிடையாது. இந்திய தேசியத்தின் வளங்களைப் பங்கிட்டுக் கொள்வதிலும், பகிர்தலிலும், ஒரு நேர்மை கிடையாது என்பதை தொடர்ச்சியாக தமிழகம் போன்ற மாநிலங்களுக்கு அயல் மாநிலங்களால் நடக்கும் வஞ்சிப்புக்களின் மூலம் நாம் அறியலாம்.

ஒரு நாடு தன்னில் தன்னிறைவு பெற்று, தன் குடிகளை சுபிட்சமாக்கி, தன் ஆளுமையை தன் தேசம் கடந்து, வெவ்வேறு பிராந்தியங்களில் பணமாகவும், படையாகவும் செலுத்த இயலுமெனில் அதுதான் வல்லரசு நாடு....

சென்னை போன்ற தமிழகத்தின் தலை நகரங்களில் கூட தொடர்ச்சியான மின்வெட்டு, தமிழகம் முழுவதும் மட்டுமின்றி ஒட்டு மொத்த இந்தியா முழுமையும் மின்சாரப் பற்றாக்குறை, இயற்கை வளங்கள் நிறைந்த ஒரு தேசத்தில், ஒரு வருடத்தில் மிகையான மாதங்களில் கொளுத்தும் வெயிலைக் கொண்ட ஒரு தேசத்தில் மின்சாரம் தயாரிக்க திட்டங்கள் இல்லை என்பதை எப்படி எடுத்து கொள்வது என் தேசத்தீரே...?

அதிகப் பொருட்செலவு ஆகும் என்று திட்டங்களை உதறித் தள்ளும் இந்திய ஆளுமை, வேண்டாம் வேண்டாம் என்று அண்டை நாடுகள் சொல்லும் போதும் தங்கள் உதவிகளை அங்கே குவிக்கும் குறுகிய அரசியல் நோக்கத்தின் பின்னணி என்ன?

சர்வ நிச்சயமாய் இந்தியா அதிக பணக்கார முதலாளிகளைத் தொழிலதிபர்களாயும், அரசியல் தலைவர்களாயும் கொண்ட, எப்போதும் லஞ்ச லாவண்யங்களையும் நேர்மையற்ற அரசியலையும் கொண்ட தன்னை எப்போதும் மிகைப்படுத்திப் பார்த்துக் கொள்கிற ஒரு வறுமையின் தேசம்தான்...!

சாலை வசதிகள் இல்லாமலும், சுகாதர வசதிகள் இல்லாமலும், சுற்று வட்டாரத்தில் மருத்துவ வசதிகள் இல்லாமல் குறைந்த பட்சம் ஐந்து மைல்கள் தாண்டி செல்ல வேண்டிய அவசியமும், மின்சார வசதிகள் இன்றியும், குடிநீர் வசதிகளின்றியும், ஒருவேளை நெல் சோற்றை சாப்பிடவே வக்கற்ற குடும்பங்களை புறநகர்ப்பகுதிகளிலும், கிராமங்களிலும் ஒளித்து வைத்துக் கொண்டுதான்...

வல்லரசு கோஷத்தோடு இந்திய குடியரசை நாம் போற்றிக் கொண்டிருக்கிறோம் தோழர்களே....!

கல்வியறிவில் மிகுந்த மாநிலம் என்று இந்தியாவால் அறிவிக்கப்படும் ஒரு மாநிலத்தில் தான் முட்டாள்தனமாக அணை இடிந்து விடும் என்று கூறி போராட்டங்கள் நடத்தி தண்ணீர் தர மறுத்து வெந்நீரை ஊற்றி மனிதர்களைக் கொல்லும் மனிதர்கள் வசிக்கிறார்கள்....

கல்வியறிவு என்று தேசம் கூறும் மனிதர்களின் அறிவின் உயரம் என்னவாயிருக்கும் என்று யோசித்துப் பாருங்கள், இது வல்லரசு இந்தியாவா? அல்லது குள்ளரசு இந்தியாவா? என்பதை நீங்கள் விளங்கக்கூடும்....!

அறிவால் முன்னேற முடியாமல் மக்களைக் கிடுக்குப் பிடிபோட்டு இன்னமும் சாதிப் பிரச்சினைகளையும், மதப்பிரச்சினைகளையும் வைத்து அரசியல் செய்யும் அரசியல்வாதிகளைக் கொண்ட தேசம் எப்படி வல்லரசு ஆகும்...?

ஏதோ ஒரு சாதியில் பிறக்கிறான், வளர்கிறான் அதைத் தனது அடையாளமாகக் கொண்டு கூட்டம் கூட்டி ஒரு அமைப்பாகும் போது அதை முற்போக்கு புத்திகள் கொண்டவர்களாக தங்களை அறிவித்துக் கொள்ளும் அரசியல்கட்சிகள் வாக்குகளுக்காக அண்டிப் பிழைக்கும் போக்கு உள்ள தேசம் எப்படி ஒரு வல்லரசு என்று கூறுவீர்கள்...?

சிறு சிறு நாடுகள் எல்லாம் அணு ஆயுதங்களில் தன்னிறைவு பெற்ற பின்னரும் நாம் அணு குண்டு வெடித்ததையும், ஏவுகணைகள் செய்ததையும் வைத்துக் கொண்டு பெருமை பேசிக் கொண்டிருப்பதின் பின்னணியில் இருக்கும் அறியாமைச் சாயம் எப்போது என் தேசத்தில் வெளுக்கும்....?

அன்புத் தோழர்களே...இந்தியா சுதந்திரம் அடைந்தது.....இந்தியா குடியரசு ஆனது....கூடவே இங்கே மேல்தட்டு மக்கள் மேலும் மேலும் பணம் சேர்த்துக் கொண்டு ஆடம்பரமாய் வாழக்கூடிய ஒரு சமூக அரசியலும் புகுத்தபட்டது.....

சாமானியன், சாமானியனாகவே இன்னமும் சாணம் மொழுகிய வீட்டில் மழைக்கு ஒழுகுமே என்று கூரை மேய்ந்து கொண்டிருக்கிறான் வல்லரசு நாட்டின் ஒரு குடிமகன் என்ற கனவோடு..!

இதுதான் இந்திய தேசியம்...! இதுதான் இந்தியா....!

இந்தியாவை ஆளும் காங்கிரசும், மாற்றாக கருதப்படும் பாரதிய ஜனதாவையும் கடந்து மூன்றாவதாய் ஒரு ஆளுமை நிறைந்த சக்தி புத்துணர்ச்சியோடு வரவேண்டியது தான் தற்போது இந்த தேசத்தின் தேவை.....

இது நிகழவில்லையெனில்...

அடுத்த ஐம்பது ஆண்டுகளுக்குள் துயரப்படும் மக்கள், ஒடுக்கப்பட்ட மக்கள், எல்லாம் ஒன்று சேர்ந்து அதிகார அரசியலுக்கும், முதாலாலித்துவ மூளைகளுக்கும் சமாதி கட்ட வெகுண்டெழுந்து தன்னிச்சையாக போராடத் துவங்குவார்கள் என்பது சர்வ நிச்சயம்.....!

அப்படியான ஒரு போராட்டத்தின் முடிவு....சோவியத் ருஷ்யாவை முன்னுதாரணமாக்கிக் கொள்ளும் என்பதும் காலத்தின் கட்டாயம் ஆகும்...!

கழுகு வாசகர்களுக்கு இனிய குடியரசு தின நல் வாழ்த்துக்கள்

கழுகு

(கழுகு இன்னும் உயரப்பறக்கும்)

டீக்கடை பெஞ்ச்....! சூடான அரசியல் இங்கு கிடைக்கும்... (25.1.2012)

2012-01-25T08:45:00.000+05:30

கனகுவும் ரெங்குவும் பேசிக்கொண்டு வந்தனர்.... என்னய்யா ரெங்கு இப்படி பயந்து பதுங்குற..?! என்ன உன் வீட்டு அம்மா வராங்களா..??

ரெங்கு : அட நீ வேறய்யா.. அங்க பாரு ஒரு வெறிநாய் போகுது... அதான்.

கனகு : அதுக்கு நீ ஏன்யா பயப்படுற..?! அதுங்க தானே பயப்படனும்..??

ரெங்கு : என்ன ஜோக்கா..?? போன வருஷம் வெறி நாய் கடிச்சு இருபதாயிரம் பேர் இறந்து போய் இருக்காங்களாம்..!! அப்போ பயப்படாம இருக்க முடியுமா..??

கனகு : அட கொடுமையே.. இது வேறயா... நாயை கொன்னா அனிமல் பிளானட்ல இருந்து வருவாங்க... நாம என்னதாய்யா பண்றது ... சரி.. சரி.. நீ என்ன கடிக்காம வா..

ரெங்கு : ஹெல்மட் போடலேன்னா போலீஸ் பிடிக்குது... போட்டா நாய் பிடிக்குது. என்ன கொடுமை கனகு..?! இதுல வேற அபராத தொகைய வேற உயர்த்திட்டாங்களாம்.

கனகு : அட பாவிங்களா..போலீஸ்க்கு கிம்பளம் உயர்வு வேறயா... இதுக்குதான் நான் பைக் யூஸ் பண்றதே இல்ல..

என்னாதான் அபராத தொகைய ஏற்றினாலும் அரசு கஜானா ரொம்ப போறது இல்ல.. போலீஸ் பாக்கெட் தான் ரொம்ப போகுது... ஒரு பக்கம் பெட்ரோல் விலை உயர்வு. இன்னொரு பக்கம் இது. இதுக்குதான் பைக்கை தூக்கி போட்டுட்டேன்.

ரெங்கு : நீ பொழைக்க தெரிஞ்ச ஆளுய்யா... பொழைக்க வழி தெரிஞ்சா பக்கத்து நாட்டுகாரன்கிட்ட எல்லாம் அடிவாங்குவோமா...?

கனகு : என்னய்யா சொல்ற..?! யாரு உன்ன அடிச்சா..??

ரெங்கு : என்ன யாரும் அடிக்கலப்பா... ராமேஸ்வரம் மீனவர்களை தான் தினம் அடிக்குறாங்களே.. இலங்கை ராணுவம் ஒரு பக்கம் அடிக்குது. இன்னொரு பக்கம் இலங்கை மீனவர்கள் அடிக்குறாங்க... இது தான்யா வீட்டையும் கொடுத்துட்டு அடியும் வாங்குறது..

கனகு : நம்ம நாட்டுக்கு வர அமெரிக்காகாரனை அடிச்சா அமெரிக்கா சும்மா இருக்குமா..?! அவன் விடுற சவுண்ட்ல இவிங்க போய் காலுல விழுவாங்க... அதான்யா வல்லரசு நாடு. இவங்களால ஒரு சின்ன நாடு அதையே கட்டுப்படுத்த முடியல... அப்பறம் எங்க இருந்துய்யா உலகத்தையே கட்டுப்படுத்த போறாங்க...?! இந்தியன்னு சொல்றதுக்கே வெக்கமா இருக்குய்யா..

ரெங்கு : என்னய்யா கனகு இப்படி டென்சன் ஆகுற..?! டீய குடிய்யா.. அண்ணாச்சி.. சூடா இருக்கற கனகுக்கு சூடா ஒரு டீ போடுங்க..

கனகு : பின்ன என்னய்யா மீன் பிடிக்குற வேலையே செத்து செத்து பொழைக்கற வேலை. இதுல இவனுங்க வேற சுட்டு கொன்னு போடுறானுங்க... நம்ம ஆளுங்க அதுக்கு சன்மானமா நம்ம வரி பணத்தையே எடுத்து அவனுங்க கிட்ட கொடுக்குறானுங்க.. என்னைக்கு மக்கள் சூடாக போறாங்களோ அப்போ இருக்குய்யா இவங்களுக்கு...

ரெங்கு : நீ வேறயா.. மக்கள் புரட்சி எங்க நடக்குது..?! செருப்பு புரட்சி தான் நடந்திட்டு இருக்கு நாட்டுல..

கனகு : இப்போ யாரு அடி வாங்கினது.. செருப்பு விக்குற விலைக்கு இப்படியா பண்ணுவாங்க...?!

ரெங்கு : யாரு... நம்ம ராகுல் தான் அடிவாங்கினார்..இதுல செருப்பால அடிச்சா எல்லாம் பயந்துட மாட்டாராம்.சொல்றார்..

கனகு : ஆமா.. ஆமா.. அவர் எப்படி பயப்படுவார்..?! அவங்க தான் பரம்பர பரம்பரையா அடிவாங்குறாங்களே... பயம் இருக்குமா என்ன..!! இனி இவரு சொல்லிட்டு திரிவாரு நானும் ரவுடிதான்... நானும் ரவுடிதான்னு...

ரெங்கு : அட இதுல அவங்களுக்கு பரம்பரை எக்ஸ்பிரியன்ஸ் இருக்கா...?! இதுல குரளி வித்தை காட்டுற மாதிரி அய்யா வாங்க அம்மா வாங்கன்னு வேற கூப்புடுறாங்கய்யா இந்த கட்சிகாரங்க..

கனகு : அட என்ன குரளி வித்தை காட்றாங்களா..நான் இப்பயே போய் பாக்குறேன்... யாரை யாருய்யா கூப்பிட்டாங்க..

ரெங்கு : ஞானதேசிகன் நம்ம பாரதிராஜாவை காங்கிரஸ்க்கு கூப்பிடுறார்ய்யா...

கனகு : யாருய்யா அது ஞானதேசிகன் அவரு என்ன ராகுல்காந்தியா..?? ஆமா அவருக்கு காங்கிரஸ் கட்சி மேல அவ்வளவு என்ன கோவம்..??

ரெங்கு : யோவ் அவர் தானய்யா தமிழ்நாட்டு காங்கிரஸ் தலைவர்.. அவருக்கு என்னய்யா கோவம் இருக்க போகுது அவர்தானய்யா மாநிலதலைவர்.

கனகு : பின்ன இவர் தான் காங்கிரஸ்க்கு ஓட்டு போட கூடாதுன்னு பிரச்சாரம் பண்ணார். இவரை கூப்பிடுறாரே அதான் கேக்குறேன்... அதுக்கு பாரதிராஜா என்னய்யா சொல்றார்..?!

ரெங்கு : காமராஜரையே தோற்கடிச்சி இருக்காங்க...அதனால இவருக்கு அரசியல்ன்னா பயமாம்...

கனகு : ஆமா இவர் அப்படியே காமராஜர் போயா போ... ஆமா கள்ளுல அதிகம் கிக் இருக்கா பிராந்தில அதிகம் கிக் இருக்கான்னு பார்க்கலாமா ரெங்கு..??

ரெங்கு : இதுல எல்லாம் கிக் இருக்கான்னு எனக்கு தெரியாது ஆனா நான் எட்டி ஒன்னு உதைச்சா அதுல இருக்கும் பார் ஒரு கிக்... அதுவேணுமா..??

கனகு : யோவ் நான் கேட்கலையா கள் இறக்கும் இயக்கம் கேக்குறாங்க.. அதான் ஒரு டெஸ்ட் டிரைவ் போலாம் பார்த்தேன்..

ரெங்கு : ஏம்ப்பா நான் தெரியாம தான் கேக்குறேன்.. தென்னைல எல்லாமே வியாபாரம் செய்றாங்க போதிய அளவு வருமானம் வருது. இருந்தாலும் ஏன் இவங்க இந்த கள்ள பிடிச்சு தொங்குறாங்க.. கள்ளு இறக்க அனுமதி கொடுத்தா கள்ளச்சாராயம் சேர்ந்து ஓடும். அப்பறம் விஷசாராயம் குடித்து பலின்னு வரும் தேவையா..

கனகு : யோவ் நிறுத்து நிறுத்து.. அரசுக்கு பெரிய வருமானம் இழப்பு வரும் போல... ஏற்கனவே கஜானா காலியா இருக்கு இதுல அந்த வருமானமும் போய்டும் போலயே....

ரெங்கு : கள்ளு குடிச்சா நீ கல்லு தன் உடைக்கணும் ராசா..

கனகு : நான் வரலையா இந்த ஆட்டத்திற்கு... அண்ணாச்சி சீக்கிரம் கள்ளு போடுங்க "சாரி சாரி டீ டீ"

கழுகு

(கழுகு இன்னும் உயரப்பறக்கும்)

பஞ்ச்' சாமிர்தம் நிஜமாவே இனிக்கும் (19.1.2012)

2012-01-19T15:43:00.001+05:30

பஞ்ச் : 1

தமிழகத்துல ஆட்சி மாற்றம் நடந்ததுக்கு காரணம் நடராசன் ஐயாதானுங்களாமே...? அவரு மனசு வச்சிதான் கலைஞர் கூட போன வருசம் இருந்து இருப்பாருன்னு நினைக்கிறேன். யாருக்கும் கட்டுப்படாத ஒரு தலிவராம் நடராசரு... ஆனா ரெண்டே ரெண்டு பேருக்கு மட்டும் பயப்புடுவாராம்...ஒண்ணு நம்ம பழ. நெடுமாறன் ஐயா..... ரெண்டாவது அவுரு கல்யாணம் கட்டுன அம்மிணி...

தஞ்சாவூர்ல கொதி கொதின்னு கொதிச்சு இருக்காரு நடராசரு, ரெண்டு உலக்கு அரிசிய போட்ருந்தா கொதிச்ச கொதிப்புல பொங்கி சாப்டு இருக்கலாம் போலருக்கே...! அம்மாவுக்கு பூசாரிங்க எல்லாம் ஒண்ணு கூடி மந்திரிச்ச மந்திரிப்புல லவக்குனு ஒடன் பொறவா சகோதரிய வெளிய அனுப்பிடுச்சு.. இப்போ நடராசன் & கோ தைய தக்க தைய தக்கானு வெறி கொண்ட மாறி குதிக்க ஆரம்பிச்சுடுச்சு...

தானை தலைவர்களால் நிரம்பிக் கிடக்கும் தமிழகத்தின் தலையெழுத்துதான்.. மாறவே மாட்டேங்குது...? எந்த சாமி குத்தமோ...??!!!!!

பஞ்ச் : 2

துக்ளக் ஆண்டுவிழாவுல சோ சார் பண்ணியிருக்கிற காமெடிய நினைச்சா சிப்பு சிப்பாதான் வருது...

கையெல்லாம் இரத்தக்கறையோட ஒரு மனுசன் அதை டெட்டாயில் போட்டு கழுவிட்டு, சோப்பு போட்டு கழுவிட்டு அதுல சோத்த அள்ளி எல்லோருக்கும் போட்டு போட்டு, வாரி வழங்கி தன்ன கர்ண பிரபுன்னு காட்டிக்க நினைச்சானாம்....ஆனா அவன் எம்புட்டுதான் உதவி செஞ்சாலும் புத்திசாலியா இருந்தாலும் கொலைகாரப் பயடா இவன் அப்டீங்கறது எப்படி மறந்து போகும்? இருக்கற கட்சியோட கொள்கை இந்துத்துவான்ற ஒரு கேவலமான மதவாதம்.அப்படி இருக்கையில மோடி நல்லவரா இருக்கட்டும் வல்லவரா இருக்கட்டும், எப்புடி வேணா இருக்கட்டும்...இருக்குற எடம் சாக்கடையாச்சே....அவர பிரதமர் வேட்பாளர் ஆக்கணும்னு சோ அண்ணாச்சி அத்துவானிக்கி ரெக்கமண்டேசன்....

ஒருவேளை மதவாத கட்சின்னு நினைச்சு யாரும் ஆதரவு தெரிவிக்கலேன்னா (அது என்ன ஒருவேளை...அது மதவாத கட்சிதானே சோ....சார்...???!!!!) அப்போ டாக்டர். புரட்சித்தலைவி, அம்மா. செ. செயலலிதாவ இந்திய பிரதமராக்க உதவி செய்யணும்ன்னு அவர் சொல்லியிருக்காரு...

தமிழ்நாட்ல ஏற்கெனவே 3 மணி நேரமா இருந்த மின்வெட்ட இப்போ 5 மணி நேரமா அம்மா மாத்தி சாதனை செஞ்ச மாதிரி, தலைமைச் செயலகத்த ஆஸ்பத்திரியா மாத்துன மாதிரி, லைப்ரேரிய குழந்தைகள் மருத்துவமனையா மாத்த சட்டம் போட்ட மாதிரி....பலப்பல அஜால் குஜால் திட்டங்கள செஞ்சி இந்தியா முழுக்க மாத்தணும்னு சோ சார் ஆசைப்படுறாரு போல....

நடக்க அலுப்பு பட்டுகிட்டு சித்தப்பன் வீட்ல பொண்ணு கேட்டானாம்ன்ற கதையாவுல்ல இருக்கு...???!!!!

பஞ்ச் : 3

எஸ்.எம். கிருஷ்ணாவ அனுப்பி தமிழர்கள் புனர்வாழ்வுக்கு இந்திய மகா தேசம் ரொம்பவே ஒதவுறதா காட்டிகிட முடிவு பண்ணி ஐயாவ இத்தாலிய தேசிய (இந்திய தேசியம் எல்லாம் போச்சு சாமி..)காங்கிரஸ் அப்போ அப்போ ஒரு குத்தாட்டம் போடும்...! கிருஷ்ணா இந்தியாவுல இருந்து இலங்கைக்கு போற வரைக்கும் நீயூஸ் புளீச் புளீச்னு ப்ளாஷ் ஆகும்..

துரை அங்க போயி எறங்குன உடனே.. ஒண்ணியும் தெரியாது....! ராசபக்சேய சந்திச்சு கைய குலுக்கிகிட்டு பப்பரப்பான்னு சிரிச்சுக்கிட்டு ஒரு போட்டாவ போடுவாய்ங்க பேப்பர்ல...அம்புட்டுதான்...

என்னா தமிழர்களுக்கு வாழ்க்கை கொடுத்தாய்ங்க? எத்தனை வீடு கொடுத்தாய்ங்க? மக்கள் எப்படி இருக்காங்க? ஊரு எப்படி இருக்கு? அங்க இருக்க புள்ளக் குட்டிய எல்லாம் படிக்கிறதுக்கு என்ன ஏற்பாடுன்னு எல்லாம் ஒண்ணியும் சொல்ல மாட்டாய்ங்க.. தமிழர்கள் இருக்குற எடத்துக்கு சர்வதேச பத்திரிக்கையாளர்களயும் உள்ள விடுறது கிடையாது...

இவிங்க நடத்துற கூத்த நாம பாத்துட்டு நல்ல நாடகம்டான்னு உச்சு கொட்டணும்...எல்லாம் காலக் கொடுமை...!

தைரியம் இருந்தா சானல் 4 தொலைகாட்சிய தமிழர்கள் இருக்கும் ஏரியாக்குள்ள விடுவானா இந்த ராஜபக்சே..? அதை ஆதரிக்குமா இந்திய தேசிய (ஹி ஹி ஹி) ஆளும் காங்கிரஸ்...?

பஞ்ச் : 4

இயற்கைய தவிர வேறு யாராலும் கலைஞர் ஐயாவ அசைக்க முடியாது, அந்த ஆண்டவன தவிர வேறு யாராலயும் செயலலிதா அம்மாவ அசைக்க முடியாது, உலகமே எதுத்து நின்னாலும் சோனியா காங்கிரச அசைக்க முடியாது, உயிரே போனாலும் பா.ஜ.க-வ அசைக்க முடியாது, விளையாட்டுக்கு கூட விஜயகாந்த அசைக்க முடியாது....ஏன் இன்னும் சொல்லப் போனா தலை கீழ நின்னாலும் ராமதாஸ் ஐயாவ அசைக்க முடியாது...

இது எல்லாம் ஏன் தெரியுமா..?

எவன் அசைச்சாலும் அசைஞ்சு அசைஞ்சு கொடுத்துட்டு, எல்லா கட்சியிலயும் இருக்குற அயோக்கியத்தனங்கள தங்களோட வசதிக்காகவும் வாழ்க்கை சூழ்நிலைக்காகவும் வசதியா மறந்துட்டு வாழ்க.....ஒழிக கோசம் போடுறானே தொண்டன் அவன் இருக்கறதாலதான்....

ஐயாவும், அம்மாவும் அடிச்ச கொள்ளைகள் கொஞ்ச நஞ்சம் இல்லைன்னு ரெண்டு கட்சியில இருக்க ஆளுகளுக்கும் தெரியும். தெரிஞ்சே கொடி புடிக்க,கோஷம் போட நீங்க இருக்கும் போது......

எந்த அரசியல்வாதியையும் யாராலையும் அசைக்கவே முடியாதுதான் சாமி...!

பஞ்ச் : 5

ஊரை அடிச்சு கொளுத்திப்புட்டு, புண்ணுக்கு மருந்து நாங்க கொடுக்குறோம்னு ஒருத்தன் சொல்றான்னு வச்சுக்கோங்க நாம அதுக்கு நன்றி சொல்வோமா இல்லை ஏண்டா எங்களை நீ அடிச்சன்னு கேப்போமா?

ஈழத்துல இருக்குற தமிழர்கள எல்லாம் கொத்து கொத்தா கொன்னு அழிச்சப்ப கைய கட்டிக்கிட்டு வேடிக்கை பார்த்தா கூட சரி போடா போய்த்தொலைன்னு விட்டுடலாம்...ஆனா அப்படி கொல்றதுக்கு உடந்தையாவும் இருந்துட்டு இப்போ இந்தியா தொடர்ந்து தமிழர்களுக்கு ஒதவும்னு சொல்றவங்களுக்கு எல்லாம் கொஞ்சம் கூட மனசாட்சி இல்லங்கறது நமக்குத் தெரியும்....

ஆனா.. தமிழர்களையும் அவனோட புத்தியையும் எவ்ளோ கேவலமா கணிச்சு, முட்டாப்பயலுகளா நினைக்கிறான் பாருங்க..அதுதான் கொடுமையிலும் கொடுமை...!

கழுகு

(கழுகு இன்னும் உயரப்பறக்கும்)

பொங்கலோ பொங்கல்...! தமிழர் திருநாள் பற்றிய ஒரு பார்வை.....!

2012-01-15T11:05:00.001+05:30

எத்தனையோ பண்டிகைகளை இந்திய தேசத்தில் பல்வேறு கலாச்சாரங்களின் வெளிப்பாடாய் கொண்டாடி வந்தாலும் தமிழ்த் தேசத்தில் கொண்டாடப்படும் பொங்கல் விழா என்னும் தமிழர் திரு நாள் விழா மற்றர் எல்லா விழாக்களையும் விட வித்தியாசமானதுதான்...

மதத்தின் வெளிப்பாடாய், சாதியின் வெளிப்பாடாய், பல்வேறு கடவுளர்களையும், பலதரப்பட்ட மகிழ்ச்சிகளையும் வெளிப்படுத்தும் விதமாகத்தான் மனிதர்களின் பண்டிகைகள் வடிவமைக்கப்ப்பட்டது, ஆனால் பொங்கல் பண்டிகை என்பது ஒட்டு மொத்த தமிழர்களின் கலாச்சார விழாவாக, தொன்மையை விளக்கும் ஒரு ஆத்மார்த்த நிகழ்வாக பாகுபாடுகளை எல்லாம் களைந்தெறிந்து ஒரு இனத்தின் விழாவாய் எப்போதும் மிளிர்கிறது.

விவசாயத்தை சார்ந்த ஒரு இயற்கை வாழ்வினை வாழ்ந்து அதை சிறப்பித்து நன்றி கூறும் ஒரு ஒப்பற்ற நிகழ்வாய் தமிழர்களுக்கு பொங்கல் அமைந்ததோடு மட்டுமில்லாமல் அவனது கலை, வீரம், பண்பாடு எல்லாவற்றையும் ஒன்று சேர உலகத்திற்கே எடுத்தியம்பும் ஒரு அற்புதமான மனித அளாவல் இது. மனிதர்கள் மனிதர்களை நேசிப்பதும், தெய்வங்கள் என்று தத்தம் மதங்கள் போதித்தவற்றை போற்றி புகழ்ந்து கொண்டாடுவதும்தான் உலகத்தின் வழமையான கொண்டாடல்.

சூரியனிலிருந்து தெறித்து விழுந்த இந்த பூமி இறுகி குளிர்ந்து மண்ணாய் மாற்றமடைந்து அந்த மாற்றத்தில் அதாவது மண்ணில் இருந்து இன்று செழித்து வளர்ந்து நிற்கும் பல்வேறு பரிணாம மாற்றங்களின் வெளிப்பாடுதான் மனிதன். மண்ணிலிருந்து வந்த உயிர்கள் எல்லாம் மண்ணைச் சார்ந்து வாழ்ந்து, வெளிச்சம் தரும் சூரிய ஒளியினை சக்தியாகப் பெற்றும் விண்ணிலிருந்து பொழியும் மழை நீரையும், மண்ணிலிருந்து கிடைக்கும் நீரினையும் உட்கொண்டு செழித்து வளர்ந்துதான் இந்த பூமி பல்கிப் பெருகியது.

மண்ணோடு மண்ணாக மனிதன் உறவாடி உழவு செய்து மானுடர்க்கு எல்லாம் உணவு கொடுக்கும் உலகின் ஆதி தொழிலான விவசாயத்தை செய்வதற்கு அவன் சார்ந்திருந்த எல்லா அசையும் அசையா பொருட்களுமேதான் உதவி செய்தன என்ற மிகப்பெரிய நன்நோக்கில் அதை ஒரு நன்று நவிழலாக, உழைத்து, உழைத்து அந்த உழைப்பில் தான் விளைவித்த தானியங்களை எல்லாம் அறுவடை செய்து, அந்த மகிழ்ச்சியை தன் சமூகத்தாரோடு கலந்து கொண்டாட தீர்மானித்த போது....

மனிதர்களைக் கடந்து எப்போதும் ஒளி தந்து தாம் விளைவித்த பயிர் பச்சைகளுக்கு உயிர் கொடுத்து காத்தருளிய அந்த ஆதவனை உயிராய் பாவித்து நன்றி செய்யவும், தனக்கு விவசாயத்தின் போது உதவிய மாடு, ஆடுகளை நெஞ்சார நேசித்து காலமெல்லாம் அவை செய்த விசுவாசத்துக்கு நன்றி சொல்லவும்.....

தன் இனத்தின் வீரத்தை வெளிக்காட்டிக் கொள்ள ஏறு தழுவுதல் என்னும் விழாவின் மூலம் காளைகளை துன்புறுத்தாமல் அவற்றை சீற்றமுடன் வளர்த்து அவற்றினை அருகில் சென்று எந்த வித ஊறும் செய்யாமல் அவற்றின் திமிழினைப் பிடித்து விளையாடும் வீர மாடு பிடித்தலை ஒரு மகிழ்ச்சி விளையாட்டாயும்....அவன் விளையாடிக் களித்து மகிழ்ந்து தான் வாழ்ந்து வளர்ந்த மண் சார்ந்த எல்லா நிகழ்வுகளையும் பெரு விழாவக்கி பார்த்தான்...

தமிழர்களின் கலாச்சார விழாவான பொங்கல் திருவிழா வெறும் (உறவுகள் கூடிக் களிக்கும் ஒரு விழா மட்டுமல்ல அது உணர்வுகளின் சங்கமம். மண்ணை எடுத்து அந்த மண்ணில் பாண்டம் செய்து அந்த பாண்டத்தில் பொங்கல் செய்து அவன் மகிழ்ந்த போது இயற்கையின் முழுச்சுற்றையும் தன் விழாவிற்காக அவன் பயன் படுத்தி முடித்திருந்தான். பஞ்ச பூதங்களும், இயற்கையும், மனிதரும் கால்நடைகளும், சேர்ந்து கொண்டாடும் ஒரு பண்டிகையாய் அகில உலகத்திலேயே தமிழர்களின் பொங்கல் விழா மட்டுமே இருக்க முடியும்.

சிறப்புகளை கைக் கொண்டு விழாவை விழாவாய் நகர்த்தி இதன் மூலம் நமது கலாச்சாரத்தையும் பண்பாட்டையும் உலகோர் அறியத்தான் நாம் செய்யவேண்டும். தமிழ்ப் புத்தாண்டாய் இருக்கட்டும் அல்லது தமிழர் திருநாளாய் இருக்கட்டும் அல்லது உழவர் திருநாளாய் இருக்கட்டும்....

எல்லா பெயர் அரசியல்களையும் புறம்தள்ளி விட்டு பொங்கல் என்னும் தமிழர்களின் உணர்வுத் திருநாளை நாம் அனைவரும் ஒற்றுமையாய் சிறப்பாய் கொண்டாடுவோம்....! விவசாயம் என்பது தொழில் மட்டுமல்ல அது நமது ஆதி பண்பாடு என்பதை தமிழர்கள் அனைவரும் உணரவேண்டும்...!

வரப்போகும் காலங்களில் விவசாயம் இன்னமும் செழித்தோங்கி வளர அரசு எல்லா உதவிகளையும் செய்ய வேண்டும்....மிகுதியான இளைஞர்கள் விவசாயத்தில் ஈடுபட்டு......நம் தமிழ் தேசம் செழிக்க வேண்டும்...!

கழுகின் வாசகர்களுக்கு இனிய தமிழர் திருநாள் வாழ்த்துக்களை தெரிவித்துக்கொள்கிறோம்...

(கழுகு இன்னும் உயரப் பறக்கும்....)

ரங்கனின்.....ரிலாக்ஸ் பக்கம்...! விழிப்புணர்வுத் தொடர் iv

2012-01-13T12:03:00.000+05:30

பாகம் i
பாகம் ii

பாகம் iii

வார்த்தைகளினூடே கவனியுங்கள்!!!

நம்மில் பலர் பேச்சாலேயே ஏமாந்து போகிறோமே ஏன்? யாரோ ஒருவன் நம் மனம் மகிழ பேசிவிட்டு, நம்மை சுலபமாய் ஏமாற்றி செல்கிறானே ஏன்?

நமக்கு இந்த ஒரு சின்ன இடத்தில் கவனமில்லை, அதாவது, வார்த்தைகளினூடே கவனிக்கும் கவனமில்லை.

எல்லாருக்கும் வார்த்தைகளை கவனிக்க தெரியும்..எத்தனை பேருக்கு வார்த்தைகளுக்கு நடுவில் அந்த மில்லிசெகண்ட் மவுனங்களை, அந்த மவுனங்களுக்கு பின்னால் ஒளிந்திருக்கும் வேறுபட்ட அர்த்தங்கள் புரிந்துகொள்ள தெரியும்?

எனக்கு தெரியும் என்பதற்காக இதை சொல்லவில்லை. எல்லாராலும் முடியக்கூடிய ஒரு சங்கதி என்பதால் இதை உங்களுக்கு மறுஅறிமுகம் செய்துவைக்கிறேன் அவ்வளவுதான்.

எத்தனையோ முறை, நாம் ஒரு நண்பரிடமோ, அல்லது நம் உறவுகளிடமோ, நம் உடன் வேலைசெய்பவர்களிடமோ பேசி இருப்போம்.. ஆனால் இவ்வளவு கூர்மையான கவனம் நம்மிடத்தில் இருக்காது. காரணம், அவர்கள் பேச்சை நாம் கவனிப்பதே குறைவுதான்.அவர்கள் பேசி முடித்ததும், நம் பேச்சை வீசிவிடவே நம் மனம் தயாராய் இருக்கிறதே தவிர, நம் முழுகவனத்தோடு நாம் ஒரு பேச்சை கவனிக்கும் நேரம் மிக மிக குறைவுதான்.

அப்படி நீங்கள், நின்று நிதானித்து, அவர் பேச்சை உன்னிப்பாக கேட்பவராக இருக்கும்பட்சத்திலேயே உங்களிடம் பேசுபவர் கொஞ்சம் கலக்கமடைவார். இது முதல் கட்டம்.

அடுத்த கட்டம், அவரின் கண்களை நேருக்கு நேர் சந்தித்து, அவரை முழுதாய் கவனிக்கிறீர்கள் என்று அவருக்கே சுட்டிக்காட்டும்போது, அவருக்குள் தானே நேர்மை பொங்கும்.. இப்போது ஒன்று அவர் உண்மையானவர் என்கிற பட்சத்தில் அவர் உங்களோடு நெருங்கி பழக விரும்புவார், பொய்யானவர் தப்பித்து ஓடவே முயல்வார்.

இப்படி, நீங்கள் வெறுமனே கவனமாய் இருக்கும்பட்சத்திலேயே, உங்களின் நண்பர் யார், உங்களுக்கு ஆகாதவர் யார் என்பதை எளிதில் கண்டுபிடித்துவிட முடியும்.

இவைகளை எல்லாம் தாண்டி, மூன்றாவது கட்டம், வார்த்தைகளினூடே கவனித்தல்- இது ஒன்றும் பெரிய கம்பசூத்திரமில்லை. முதல் இரண்டு கட்டங்கள் உங்களுக்கு நன்கு பழகி இருந்தால், இந்த மூன்றாவது கட்டம் தானே நிகழும். நீங்கள் உங்களோடு பேசுபவரின் Intentions -ஜ சரியாக நீங்கள் புரிந்துகொள்ளலாம். சிலருக்கு தனிமையை போக்க, உங்களோடு பேசுவது உதவியாய் இருக்கும், சிலர் விஷயங்களை கறக்க உங்களோடு பேசிகொண்டிருப்பார்கள், சிலர் உங்களை அவர்களின் பேச்சால் ஈர்த்துவிட உங்களிடம் பேசுவர், வெகு சிலர், அவர்களின் மனகஷ்டங்களை சொல்ல உங்களிடம் பேசுவர், லட்சத்தில் ஒருவர், உங்களுடைய வளர்ச்சிக்காக பேசிக்கொண்டிருப்பார்...

இப்படி, நீங்கள் வார்த்தைகளினூடே கவனிக்கும்போது, அடுத்த நபரின் Intentions(சீனா அய்யா தமிழர்த்தம் வேணும்) நமக்கு எளிதில் புரிபடும். அப்போது, நாம் சொல்லவேண்டியவற்றை மட்டும், சொல்லவேண்டியவர்களுக்கு சொல்லி, வாழ்வை செம்மையாக நடத்தி செல்ல முடியும் என்பது என் கருத்து.

அப்புறம், உடனே கண்ணை சார்ப்பாகிகிட்டு, சீரியஸா முகத்தை வெச்சிகிட்டு, வெறிச்சு பார்த்துகிட்டு இருக்காதீங்க.. வெளியில் முகம் சாந்தமாய் தெளிவாக இருக்கட்டும், உள்ளே கவனம் கூர்மையாய் இருந்தால் போதும்..Hahhaha!...இது வெறுமனே எனது சிந்தனைகள் தான்..உங்களுக்கு உதவுமென்றால் எடுத்துகொள்ளுங்கள்..இல்லையேல் வேண்டாம்..

கழுகிற்காக
உங்கள் ரங்கா

(கழுகு இன்னும் உயரப் பறக்கும்....)

பஞ்ச்' சாமிர்தம் நிஜமாவே இனிக்கும் (12.1.2012)

2012-01-12T11:15:00.000+05:30

பஞ்ச் :1

தேவேந்திர குல வேளாளர் கூட்டமைப்பின் தலைவர் பசுபதிபாண்டியன் படுகொலை செய்யப்பட்டதின் எதிரொலியாய் அவரது இறுதி ஊர்வலத்தின் போது கடுமையான வன்முறையை தூத்துக்குடி நகரம் சந்தித்து இருக்கிறது. வன்முறை என்பது எந்த ரூபத்தில் வந்தாலும் எந்த நியாயத்திற்கு வந்தாலும் அது தவறுதான்.

தனது தலைவர் கொல்லப்பட்டதற்கு தெருவில் போவோர் வருவோரை எல்லாம் பிடித்து அடிப்பதும், கடைகளை கொளுத்துவதும், அலுவலகங்களை அடித்து நொறுக்குவதும் எப்படி தீர்வாகும்? மிக மிக நுண்ணிய உணர்வுகளை தூண்டி விடக்கூடிய பிரச்சினைதான் சாதிப் பிரச்சினை...

என் நியாயம் உன் நியாயம் என்று பேசுவதை விட்டு விட்டு....மனிதநேயத்தோடு மக்கள் வாழ தகுந்த சூழலை அரசு மட்டும் இல்லாமல் அரசியல் கட்சிகளும், தமிழக மக்களும் உருவாக்க வேண்டும்..! கொலைவெறியாட்டம் ஆடும் ரவுடிகளை தடுக்க முயலுகையில் துப்பாக்கி சூடு நடத்தும் போலிசாரையும் நாம் தான் திட்டுகிறோம்....சாதாரண முறையில் தடுக்க முயன்றால் போலீசுகாரன் வேடிக்கை பார்த்துட்டு நிக்கிறான்டா என்றும் கூறுகிறோம்....!

வன்முறையில்லாத சமுதாயத்தை ஒரு அரசால் மட்டும் படைக்க முடியாது...மக்களும் ஒத்துழைக்க வேண்டும்.

பஞ்ச் :2

நக்கீரன் கோவாலுவோட வரலாற எடுத்து பாத்தீங்கன்னா மூணு இல்லை நாலு லைன்ல அது முடிஞ்சு போயிடும். அம்மாவை எதுத்து காரசாரமா எப்பவும் எழுதி அடிவாங்குற மாதிரி கைது பண்ணி உள்ள போற மாதிரி போயி பத்திரிக்கையோட சர்க்குலேசன ஏத்துற வேலைய அம்மா ஆட்சியில தவறாம செய்வாப்ல...,

அப்புறம் வீரப்பன வைச்சு நல்லா காசு பாத்தாப்ல, பாரிஸ்ல பஸ்ல ஏறி தி.நகர்ல எறங்கி ரெங்கநாதன் தெருவல சரவணா ஸ்டோர்ல போயி துணி எடுக்குறது கணக்கா பொசுக்கு பொசுக்குனு இவுரு போயி காட்டுல பேட்டி எடுத்துட்டு வந்தப்ப இந்தியாவோட இறையாண்மையும் போலிஸியும் தெருவுல பலிங்கி வெளையாடிகிட்டு இருந்துச்சு..., அம்மா ஆட்சியில வீரப்பன கொன்னு போட்டதோட நக்கீரனோட பிசினசையும் சேத்தே கொண்டு புடிச்சி...

ஈழத்தமிழர் ஆதரவு போர்வையை போத்திகிட்டு போட்டோ வீடியோன்னு காசு பாத்திகிட்டு இருந்த கோவாலுக்கு அதுலயும் ஒரு லெவலுக்கு மேல போக முடியலை... ஏன்னா கலைஞர் ஐயாவோட ஆட்சியில வாலு ஆடாம இருந்துச்சுனா ஐயா கடுப்பாயிட்டாருன்னா.. நக்கீரரு ரெண்டு கட்சியையும் பகைச்சுகிட்டு வெளையாட முடியாது...!

சாமியாரு நித்தி வெவகாரத்துல டவுசரு கிழியறதுக்கு முன்னாடி முந்திகிட்டு.. மாட்டுகறி மாமின்னு கவர் ஸ்டோரி போட்டு எஸ்கேப் ஆகலாம்னு பாத்தாரு....ஆனா ஆபிச ஒடைச்சு சாணிய கரைச்சு ஊத்தினதோட அம்மா கட்சி ஆளுகளுக்கு சைலண்ட்டா இருக்க ஆர்டர் போட்டுடுச்சு போல....நக்கீரன் கோவாலு அடுத்து என்ன செய்றதுன்னு யோசிச்சிகிட்டு இஞ்சி தின்ன கொரங்காட்டமா இப்போ முழிச்சுகிட்டு இருக்காரு...!

அம்புட்டுதேன் நக்கீரரு கதையிங்க..!

பஞ்ச் :3

எதிர்கட்சி தலைவரு பயங்கர கோவமா இருக்காராமுங்க...! ஆமாம் சினிமாவுல கிளிசரின் போட்டிகிட்டு கண்ண செவக்க வச்சிகிட்டு..(அவுருக்கு கண்ணு செவக்க வேற காரணம் இருக்கு..ஹி ஹி ஹி) கையித்த கட்டி தூக்குவானுவோ.. இவரு பறந்து பறந்து காலாலேயே அடிப்பாரு..., வசனகர்த்தா எழுதி கொடுக்கிற டயலாக்க தொண்டைய அனத்திக்கிட்டு பேசி கைதட்டல வாங்கி தேசப்பற்று இருக்குற ஹீரோவா ஆகிப்புட்டாரு...

அரசியல் என்ன அம்புட்டு ஈசியாங்க....... மக்க சினிமாவ பாத்துபுட்டு ஓட்டு போட்டுருச்சுக.. ஆக்சுவலி சார்க்கு இப்போ என்ன செய்யிறதுன்னு ஒண்ணியும் புரியாம...என்ன பேசினாலும் இந்த சனம் நம்மள மதிக்க மாட்டேங்குது.. சினிமாவுல ஹீரோவா இருந்த நம்மள நெசவாழ்க்கையில் ஜீரோவா பாக்குதகளேன்னு ரெண்டு மூணு ரவுண்டு ஆனதுக்கப்புறம் கண்ணு செவக்க டெய்லி கோவப்படுறாராம்...

பொங்கல் கொண்டாட கரும்பு, அரிசி, வெல்லம் எல்லாம் கொடுக்கப்போறதா வேற சொல்லிக்கிறாய்ங்க.. ஆனா விசயகாந்த் எந்த அரிசி கொடுத்தாலும் சரி அவரு பருப்பு தமிழ்நாட்ல வேகாதுன்றது பாவம் அவருக்கு எப்புடி தெரியும்...?

பஞ்ச் :4

இராமேஷ்வரத்துக்கு சாமி கும்பிட வந்த ராஜபக்சேயோட மைத்துனர தேடிப் போயி, நம்ம தமிழர் கட்சிக்காரவுகளும், மதிமுக..காரவுகளும்....அடிடா.....அவனை ....உதைடா அவனைன்னு ஒரே ரகளையாமுங்க...

ஏய்யா..சோனியா வந்துட்டுப் போனிச்சி, ராகுல் வந்துட்டுப் போனாரு, பிரதமர் ஐயா வந்துட்டு போனாரு...அப்போ எல்லாம் ஏதாச்சும் போராட்டம் பண்ணினா பிரயோசனம் இருக்கு...! ராசபக்சே வீட்டு வேலைக்காரன அடிச்சு நமக்கு என்ன ஆகப் போகுது சாமி..? மறுக்கா அவெங்களும் அப்பாவிகள அங்க அடிக்க ஆரம்பிச்சா என்னாகும்..?

ஆளும் காங்கிரஸ் கட்சியோட மந்திரிமாருகளை குறிப்பா சிதம்பரம் ஐயா மாதிரி ஆளுகள தமிழ்நாட்டுக்குள்ள வரக்கூடாதுன்னு போராட்டம் பண்ணுங்க.. பிரோயோசனமா போகும்..

துரோகிய ஊருக்குள்ள வைச்சிகிட்டு.. எதிரி வீட்டு ஓணான பிடிச்சு அடிக்கிறதுதான் இனத்தோட வீரமா என்ன?

பஞ்ச் :5

விரிவான மருத்துவ காப்பீட்டு திட்டத்தை மாண்புமிகு முதல்வர் அம்மா இன்று தொடங்கி வச்சது எல்லாம் சரிதான்....

கஜானால காசு இல்லாம அல்ரெடி விலைவாசிய ஏத்தி எங்க குரல்வளைய நெறி நெறின்னு நெறிச்சுக்கிட்டு இருக்கையில இப்படி விரிவான திட்டம், அபாரமான திட்டம்னு எதுக்கு காச கண்ட மேனிக்கு செலவு பண்றாங்க? உங்க தேர்தல் அறிக்கைய நிறைவேத்த எங்க தலையில கைய வச்சு எங்களுக்கே கொடுங்கன்னு அவுங்கள யாரு கேட்டா...?

ச்ச்சும்மா கையில காசு இல்லாத நேரத்துல இது எல்லாம் தேவை தானுங்களா அம்மா?

#நாடு நமது வீடு..#

கழுகு

(கழுகு இன்னும் உயரப்பறக்கும்)

டீக்கடை பெஞ்ச்....! சூடான அரசியல் இங்கு கிடைக்கும்... (11.1.2012)

2012-01-11T10:04:00.001+05:30

கனகும் ரெங்குவும் பொங்கல் பண்டிகை பற்றி பேசிக் கொண்டு டீ கடை நோக்கி சென்றனர்..

கனகு : என்ன ரெங்கு.. பொங்கலுக்கு ரெடியா..?? என்ன பண்ண போறே..?

ரெங்கு : என்னப்பா ரெடியா....? எப்பயும் போல டிவி முன்னாடி தான் உட்கார போறேன் ... இப்போ எந்திரன் வேற போட போறாங்க.. சொல்லவா வேணும்.. ஆமா நீ என்ன பண்ண போற..?

கனகு : நாங்க எல்லாம் சிங்கம்.. எங்கடா காளை இருக்கும் அத அடக்கலாம் பார்த்திட்டு இருப்பேன்..

ரெங்கு : நமக்கு அதெல்லாம் சரி பட்டு வராதுப்பா...!!

கனகு : ஆமா ஆமா உன்னால பொண்டாட்டியே அடக்க முடியல எங்க காளைய அடக்கப் போற..!

ரெங்கு : யோவ் போய்யா நான் போறேன்...

கனகு : சரி சரி கோவப் படாம நியூஸ் சொல்லு...

ரெங்கு : அப்பா சத்தியம் வாங்குவோம்னு சொல்றார்... பையன் சத்தியம் பண்றார்..

கனகு : யாரு அன்புமணியா..?? என்ன சத்தியம் பண்றார்... நாளை முதல்....

ரெங்கு : வாயில அடி வாயில அடி அன்பு மணி இல்ல சின்ன அய்யா...அப்படின்னு சொல்லுய்யா.

கனகு : யார் வாயில அடிக்க சொல்ற என்னய்யா சின்ன அய்யாவையா..விளக்கமா சொல்லு ரெங்கு.. ஆமா எதுக்கு அவர் சத்தியம் பண்ணார் ஏதாவது ரகசியமா..??

ரெங்கு : அட பாவி கனகு உன் வாயில தான்... இனி எந்த காரணத்திற்காகவும் எந்த கட்சியுடன் கூட்டணி வைச்சுக்க மாட்டாங்களாம்.. இது சத்தியம் சத்தியம் சத்தியம் அடிச்சு சொல்லி இருக்காரு.. நம்ம சின்ன அய்யா..

கனகு : எத அடிச்சிட்டு சொன்னாரு.. தெளிவா தான் சொன்னாரா ரெங்கு.. எதுக்கும் ஒரு தடவ அவர்ட்ட கேட்டு பாரு... விடிஞ்சா என்ன சொல்வாரோ போய்யா.. என்ன அரசியல் நடத்துறாங்க இவங்க... 2016லயாவது ஆட்சியை நாங்க தான் பிடிப்போம்னு காலத்தை ஓட்ட வேண்டியது தான்...

ரெங்கு : சரியா சொல்ற கனகு.. இந்த செய்தி தெரியுமா உனக்கு... இப்போ ஒரு பத்திரிக்கைய கொளுத்தி போட்டாங்களே அந்த பத்திரிக்கைய ஒபாமா பாராட்டினாராம்...

கனகு : என்னய்யா சொல்ற.. ஒரு வேளை "பீப்" சொன்னதாலே பாராட்டினாரோ..??

ரெங்கு : கனகு நீ வெளிய நடமாட வேணாமா.. இந்த வார்த்தைய சொல்லாதே... அவ்வளவு தான் நீ.. கிறிஸ்துமஸ் பற்றி ஒரு கட்டுரை அந்த பத்திரிகையில் வந்ததாம்.. அதை படிச்சு தான் பாராட்டினாராம் கனகு..

கனகு : யோவ் நீ சர்ச்சை இல்லாத நியூஸ் சொல்லுய்யா என் வாய் சும்மா இருக்காது.. நான் வரல அவர் பாராட்டினா என்ன பாரட்டலன்னா என்ன போ.. எனக்கு இந்த நாட்டுல பாதுகாப்பே இல்ல..

ரெங்கு : அட டா உனக்கு பாதுகாப்பா..??? பாதுகாப்பு அமைச்சகத்துக்கே பாதுகாப்பு இல்ல இதுல உனக்கு பாதுகாப்பு இல்லைன்னு சொல்ற..

கனகு : என்னய்யா சொல்ற எனக்கு புரியல..

ரெங்கு : மத்திய உள்துறை அமைச்சகத்தில் கம்ப்யூட்டர் ஹார்ட் டிஸ்க், மானிட்டர் எல்லாம் திருட்டு போகுதாம்.. அதுவும் இது இரண்டாவது முறையாம்... வெளிநாட்டுக்காரனுங்க நம்மைப்பார்த்து நமுட்டுச்சிரிப்பு சிரிச்சுக்கிட்டு இருப்பாய்ங்க...இந்தியா வல்லரசுன்னு நாம சொன்னத நினைச்சு...

ம்ம்ம்.....உள்துறை அமைச்சர் அலுவலகம் அங்கேயே பாதுகாப்பு இல்ல... உன்ன மாதரி சாதாரண மக்களுக்கு எங்க பாதுகாப்பு இருக்கும்..

கனகு : இதான்யா வல்லரசு ஆக போற இந்தியா...எப்படி வளர்றோம் நாங்க.. சரி சரி சிதம்பரம் காணாம போகமா இருந்தா சரிதான்.... !!!

ரெங்கு : திமுக பொது குழு கூட போகுதாம்.. தலைவர் ஏதாவது புதுசா சொல்வாரா இல்ல.. இன்னும் கூட்டணியில் தொடர்கிறோம் சொல்வாரா.. ?? கனகு..

கனகு : உனக்கும் வேற வேலை இல்ல.. உங்க தலைவருக்கும் வேற வேலை இல்ல.. டீ குடிக்கணும் நினைச்சா நம்ம கூட வர சொல்லு அதுக்காக பொது குழுவை எல்லாம் கூட்டி நேரத்தை வீண் பண்ணிட்டு இருக்கார்..

ரெங்கு : இல்ல கனகு சட்டசபை தேர்தலுக்கு பிறகு கூடுதே.. ஏதாவது புதுசா சொல்வார்..!

கனகு : அவர் ஒண்ணும் புதுசா சொல்ல போறது இல்ல.. கூட்டணி இல்லைன்னு சொன்னா ஏன் மத்திய அமைச்சர் பதவி கேள்வி வரும்.... அப்பறம்.அப்பா என்ன உள்ள தள்ள பாக்குறியான்னு... அஞ்சா நெஞ்சன் பஞ்சா பறந்து பயந்து வருவார்...

ரெங்கு : அப்போ அவர் டீ குடிக்க தான் பொது குழுவ கூட்டுறார்... அப்படி தானே..??

கனகு : இல்லையா பின்ன... அடுத்த பொது குழு கூடும் போது கொஞ்சம் சக்கரை அதிகமா போட சொல்லுப்பா சொல்வார் பார்.. நீ என்ன நியூஸ் சொல்ற ரெங்கு நான் சொல்றேன் பார் நியூஸ் இப்போ

ரெங்கு : அட பார்றா என்ன நியூஸ் சொல்லு பார்ப்போம்..

கனகு : கொடுத்த வாக்கை நிறைவேற்றாத பஞ்சாயத்து தலைவருக்கு அடி உதை.. தலைவர ரத்தத்தோடு ஹாஸ்பிட்டலுக்கு அனுப்பிட்டாங்க நம்ம மக்கள்..

ரெங்கு : அட பாவிங்களா இது எந்த ஊர்ல நடந்த கதையா...ரொம்ப டெர்ரர்ரா தான்ய்யா இருக்காங்க

கனகு : கிருஷ்ணகிரி மாவட்டத்துல தான் இப்படி நடந்து இருக்கு.. ஏற்கனவே ரோடு போடுறேன் சொல்லி பஞ்சாயத்து தலைவராகி இருக்காரு.. அப்போ ரோடு போடாம டிமிக்கி கொடுத்துட்டார்.. இப்போ மறுபடி அவர் மனைவிய பஞ்சாயாத்து தலைவராக்கி இருக்கார்.. ரோடு போடுறேன் சொல்லி... நீ இன்னுமா ரோடு போடுறேன்னு மூக்குலே குத்தி இருக்காங்க நம்ம மக்கள்..

ரெங்கு : செம இன்ரஸ்டிங்கா இருக்குப்பா மேல சொல்லு

கனகு : நான் என்ன கதையா சொல்றேன்.. ராஸ்கல்.. இப்படி ஒவ்வொரு ஊரிலும் மூக்குல குத்தி குருதி வெளிய வந்தா தான் வாக்குறுதி நியாபகம் வரும் ..

ரெங்கு : வன்முறைய தூண்டிவிடாதய்யா உள்ள தூக்கி போட்டுட போறாங்க.. வா டீ குடிச்சிட்டு கிளம்புவோம்...

கனகு : யார எங்களயா...?? நாங்க அப்போவே அந்த மாதிரி.. இப்போ சொல்லவா வேணும்.. அண்ணாச்சி டீ..ய போடுங்க...!!

கழுகு

(கழுகு இன்னும் உயரப்பறக்கும்)

நக்கீரனின் அத்துமீறலும்...அதிமுகவினரின் அராஜகமும்..! ஒரு ரிப்போர்ட்!

2012-01-07T18:34:00.004+05:30

பத்திரிக்கை தர்மம் என்பதை இந்திய பத்திரிக்கைகள் எல்லாம் மீறி வெகுகாலம் ஆகிவிட்டன என்றாலும், அரசியல்வாதிகளின் கைப்பாவையாய் அவை மாறிப் போன கேவலமும் சமகாலத்தில் ஒருங்கே அரங்கேறிக் கொண்டிருப்பது இன்னமும் வேதனையான விசயம். தன்னை ஒரு புலனாய்வு வாரப்பத்திரிக்கையாய் வரிந்து காட்டிக் கொண்டிருக்கும் நக்கீரன் பத்திரிக்கைக்கு மக்கள் பிரச்சினைகளை விட தனது வியாபார பெருக்கமே முக்கியம் என்பது நம் அனைவருக்குமே தெரியும்.

அதிரடி செய்திகளைத் தருகிறேன் என்ற பெயரில் இவர்கள் செய்து வரும் அட்டூழியம் ஒரு பக்கமென்றால், தங்கள் தலைவியைப் பற்றி மாட்டுக்கறி சாப்பிடும் மாமி என்ற தலைப்பில் கட்டுரை ஒன்றை வெளியிட்டு விட்டார்கள் என்பதற்காக கொலை வெறியாட்டம் நடத்தி இருக்கும் அதிமுக தொண்டர்கள் ஒரு பக்கமும் நின்று ஜனநாயகத்தினை கேவலப்படுத்திக் கொண்டிருக்கிறார்கள்.

பத்திரிக்கைகளை மத்திய, மாநில அரசுகள் கவனிக்கின்றன. பத்திரிக்கைகளை தங்கள் வசதிக்கு ஏற்றார் போல கட்டிபோட்டு வைக்கிறன. வசதியான விசயங்களை வெளியிடச் சொல்லியும், தங்களுக்கு வசதியற்ற விசயங்களை அடக்கி வாசிக்கச் சொல்லியும் அதிகாரிகளைக் கொண்டு மிரட்டி பத்திரிக்கை துறையினை முடக்கி போட்டு வைத்திருப்பதின் விளைவு விபரம் தெரியாத மக்களை, உண்மையை தெளிந்து கொள்ளாத பிரஜைகளை தேசமெங்கும் பித்தர்களாக அலைய வைத்திருக்கிறது.

நக்கீரனும் அப்படித்தான் தனது வசதிக்கேற்றார் போல தனது ரசிப்புக்கும், தனக்கு கிடைக்கும் ஆதரவுக்கும் ஏற்றார் போல செய்திகளை திரித்தும், தேர்தல்களின் போது கருத்துக் கணிப்பு வாக்கெடுப்புகளில் விளையாடியும் மக்களை மடையர்களாக வைப்பதில் தினமலர் போன்ற பத்திரிகைகளுக்கு தாங்களும் கொஞ்சமும் சளைத்தவர்கள் இல்லை என்று பலமுறை நிரூபித்து இருக்கிறது.

ஒரு பக்கம் தவறான செய்திகளை வெளியிடும் பத்திரிக்கை, மேலும் இன்வெஸ்டிகேஜன் ஜெர்னலிசம் என்ற பெயரில் நடிகைகள், மற்றும் துணை நடிகைகளின் அந்தரங்கங்கள், அரசியல்வாதிகளின் சொந்த வாழ்க்கையின் பக்கங்கள் என்றெல்லாம் மூக்கு நுழைத்து காசு பார்க்கும் நக்கீரன் போன்ற பத்திரிக்கைகள் வன்மையாக கண்டிக்கப்பட வேண்டியவையே என்றாலும்...

தனது தானைத் தலைவியை பற்றி எழுதி விட்டார்கள் என்ற ஒரே காரணத்துக்காக மிரட்டும் முரட்டு அரசியலை கையிலேந்திக் கொண்டு ரவுடிகளாக அதிமுகவினர் நடந்து கொள்வதும் எந்த ஒரு சாமானிய மக்களாலும் ஏற்றுக் கொள்ளப்பட முடியாத ஒரு விசயம்.

அரசு, சட்டம், என்பதில் நம்பிக்கை இல்லாத ஒரு கட்சியின் தொண்டர்களை வைத்துக் கொண்டுதான் அதிமுக அரசாட்சி செய்கிறது என்பது எவ்வளவு கேவலமான விசயம். ஒரு கட்சி, அதுவும் ஆட்சியில் இருக்கும் ஒரு கட்சியின் மக்கள் பிரதிநிதியான வேளச்சேரி எம்.எல்.ஏவே முன்னின்று இந்த தாக்குதலை நடத்தி நக்கீரன் அலுவலத்திற்கு பூட்டும் போட்டு பூட்டி இருப்பது....

எந்த அளவிற்கு சட்டத்தின் மீதும், காவல்துறை மீதும் அதிமுகவினர் நம்பிக்கை வைத்திருக்கின்றனர் என்பதற்கு எடுத்துக்காட்டு. முதலமைச்சர் ஒரு பக்கம் சட்டம் ஒழுங்கினை பாதுகாக்க எமது அரசு போரிடும், காவல்துறையினருக்கு உச்ச அதிகாரம் கொடுக்கப்படும் என்றெல்லாம் முழங்கி வருகிறார்....

அதோடு மட்டுமல்ல, பரமக்குடியில் விளையாடிய அரசியலில் வன்முறை வெடித்து விடும் என்று பயந்து துப்பாக்கிச் சூட்டினை நடத்தி அப்பாவி தலித்களை கொன்ற இந்த அரசு.....இன்று நக்கீரன் அலுவலகத்தை தாக்கி, சோடாபாடில், தடிகள், சைக்கிள் செயினோடு ஜானிஜன்கான் சாலையை கலங்கடித்த அ.தி.முகவினர் மீது ஒரு தடியடி நடத்தக் கூட வக்கிலாத காவல்துறையினரைக் கொண்டிருப்பது... கேவலத்திலும் கேவலம்.

தனகென்றால் ஒரு மாதிரியும், பிறருக்கென்றால் ஒரு மாதிரியும் காய்களை நகர்த்தும் சுயநல அரசியல் போக்குகளின் முடிவே தமிழர்களின் விடிவு...! அதிமுக தலைமையைப் பற்றி தவறாக நக்கீரன் எழுதியிருக்குமெனில் சட்டரீதியாக அவர்களை தண்டிக்க முடியாதா என்ன? அவர்களின் பத்திரிக்கையை முடக்க முடியாதா என்ன?

தவறுகளைத் தட்டிக்கேட்கத்தான் அரசும், அரசு இயந்திரங்களும் இருக்கின்றன என்பதை மக்களுக்கு உணர்த்த வேண்டிய ஆளும் கட்சியின் உறுப்பினர்கள் இத்தகைய கொடும் செயலில் ஈடுபட்டிருப்பதன் மூலம் சட்டமும் ஒழுங்கும் தனது வசதிக்கேற்றார் போலத்தான் பாயும் என்ற மறைமுக செய்தியை மக்களுக்கு தெரிவித்து இருக்கிறார்கள்.

பொறுப்பில்லாத பத்திரிக்கைத் துறையினருக்கும், அடாவடிகள் செய்யும் அரசியல்வாதிகளுக்கும் நடுவில் மாட்டிக் கொண்டு விழிக்கும் எம் மக்களின் விடியல் என்பது கனவாகவே போய்த்தான் விடுமோ....?

கழுகு

(கழுகு இன்னும் உயரப் பறக்கும்....)

ரங்கனின்.....ரிலாக்ஸ் பக்கம்...! விழிப்புணர்வுத் தொடர் III

2012-01-06T14:28:00.003+05:30

பாகம் I

பாகம் II

எத்தனையோ முறை, திருவிழாக்களில், பண்டிகைகளில், வருட முடிவுகளில், வருட பிறப்புகளில் இப்படி எத்தனையோ முறை நான் விழாக்களை கொண்டாடி இருக்கிறேன். ஆனாலும் எதோ ஒன்று உதைக்கிறது.

என்னவென்றால்...ஏன் பண்டிகைகளில் மட்டுமே கொண்டாட்டம் இருக்கிறது? ஏன் மற்ற நாட்களில் நாம் அதே கொண்டாட்டத்தின் பரவசத்தோடும், ஆனந்தத்தோடும் இருப்பதில்லை? இல்லை.. ஒருவேளை நாம் மகிழ்ச்சியாக கொண்டாட முடியுமா..இன்னும் அந்த கொண்டாட்ட மனப்பான்மை இருக்கிறதா என்று சோதித்துகொள்ளத்தான் நாம் விழாக்களில் கலந்துகொள்கிறோமோ? அல்லது எப்பவும் போல் நானும் கொண்டாடுகிறேன் பார் என்று பகட்டுக்காகத்தான் எல்லாரும் கொண்டாடுகிறோமா?

எனக்கென்னவோ மேற்சொன்ன இரண்டிலுமே கொஞ்சம் உண்மை இருப்பதாகவே படுகிறது. காரணம், நாம் கொண்டாட்டத்தில் முதலீடு செய்வதில்லை..செய்பவர்களில்லை.. நாம் துன்பத்திலும், துயரத்திலும், சோகத்திலும் முதலீடு செய்பவர்கள்.. அப்படி இருக்க.. கொஞ்சம் நட்டமானாலும் பரவாயில்லை என்றுதான் நாம் கொண்டாடுகிறோம் என்று எனக்கு படுகிறது. உண்மைதானே..!!

சரி.. விஷயத்திற்கு வருகிறேன்...எனக்கு தேதிகளை சார்ந்த கொண்டாட்டங்களில் நம்பிக்கை இல்லை. ஏனெனில் ஒன்று அந்த தேதியில் மட்டுமே முகம் மலர்ந்த மனிதத்தை பார்க்க முடிகிறதென்றால்.. ஒன்று, அந்த தேதி போலியாய் இருக்கவேண்டும்..அல்லது அந்த முகமலர்ச்சி போலியாய் இருக்கவேண்டும்.

ஒன்று மட்டும் நிச்சயம், மனிதனுக்கு மட்டுமே கொண்டாட்டம் சாத்தியம். சிரிப்பும், அழுகையும் மனிதனுக்கு எப்படி தனிச்சிறப்போ, அதே போல் ஒரே இனமாய்..மனித இனமாய் நின்று, ஆடி, பாடி, நகைத்து, குதூகலித்து கொண்டாட தெரிந்த ஒரே இனம், மனித இனம் மட்டுமே.

இந்த பூமியில் வாழ தனக்களித்த வாய்ப்புக்கு, இயற்கைக்கு நன்றி சொல்லி, அதன் நன்றியில் பூக்கும் மகிழ்ச்சியை பிறரோடு பங்கிட்டு, அதை கொண்டாட்டமாய் மாற்றதெரிந்த ஒரே இனம், மனித இனம் மட்டுமே.

எனவே, துன்பப்படுவதற்கும், அவதிக்குள்ளாவதற்கும் வாய்ப்பை தேடி அலைவதை கொஞ்சம் ஒதுக்கிவைத்துவிட்டு, கொண்டாட்டத்திற்கான வாய்ப்பை தேடுங்கள், நகைச்சுவைக்கான வாய்ப்பை தேடுங்கள், சின்ன சின்ன சூழல்கள், வெகு சிறிய கணங்களில் கூட கொண்டாட்டத்தை ஏற்படுத்துங்கள்.

எத்தனையோ முறை சாலைகளில் செல்கிறோம், ஒரு பட்டாம்பூச்சி குறுக்கே லாவகமாய் பறந்துபோகிறதே..கொண்டாடுங்கள்..ஆஹா எவ்வளவு அழகாய் பறக்கிறது..எத்தனை லாவகம், அதன் சிறகுகளில் எத்தனை சுதந்திரம், அதன் அழகில் மயங்கி எத்தனை எத்தனை கவிதைகள்.. மெய்சிலிர்த்து போகலாமே..நாம்.. ஏன் சிலிர்ப்பதில்லை...இனி சிலிர்க்கட்டும்.

இன்று இட்லிக்கு சட்னி இல்லையா? அருமை.. ஆஹா.. சட்னி இல்லாத இட்லி.. இதன் சுவை எப்படி என்று ஒரு கை பார்ப்போம், என்று நீங்கள் ரணப்பட்டுப்போகும் சந்தர்பங்களில் கூட சுகப்பட்டுகொள்ளுங்கள்..!!
..பேருந்தை தவற விட்டுவிட்டீர்களா? ம்ம்..நல்லது இன்று காலார நடக்கலாம்..!!

இப்படி சின்ன சின்ன கணங்களில் ஒளிந்திருக்கும் வாழ்க்கையின் மகிழ்ச்சியை, ஆனந்தத்தை, ஒரே நாளில், ஒரே தேதியில் மட்டுமே எனக்கு கிடைத்துவிட வேண்டும் என்று எண்ணுவது எவ்வளவு பெரிய முட்டாள்தனம்.

அதற்காக, புத்தாண்டுக்கும், பொங்கலுக்கும், தீபாவளிக்கும் நான் எதிரியில்லை. அந்த கொண்டாட்ட மனப்பான்மை அந்த ஒரு நாளோடு இறந்துவிடாது பார்த்துகொள்ளுங்கள் என்றுதான் சொல்கிறேன்.

வாழ்க்கையை நாம் பார்க்கும் விதத்தில் மட்டுமே வாழ்க்கை நம்மை பார்க்கும். இனி வாழ்க்கையை ஒரு கால ஓட்டமாக, ஒரு சில ஆண்டு உயிரோடிருத்தலாக மட்டும் பார்க்காமல், வாழ்க்கையை ஒரு காதலியாய், காதலனாய், தாயாய், தந்தையாய் பாருங்கள். அதனோடு கொஞ்சுங்கள், அதன் அழகில் மயங்குங்கள், அதன் கிறுக்குத்தனத்தில் வாய்விட்டு சிரியுங்கள், அதனோடு காதல் கொள்ளுங்கள்.. அந்த காதலை கொண்டாடுங்கள்.!!

இந்த கணம், ஒரு வரம், இந்த வரத்தை அடைய நீங்கள் தகுதியுடையவர் என்பதாலேயே அந்த வரம் உங்களுக்கு கிடைத்திருக்கிறது. இதை கொண்டாட வேண்டாமா?

எல்லோரும் கொண்டாடுவோம்..எப்போதும் கொண்டாடுவோம்..!!

கழுகிற்காக
உங்கள் ரங்கா

*********************

வியத்தகு சிறுமி விசாலினி

உலக சாதனை படைத்திருக்கும் நெல்லையைச் சேர்ந்த சிறுமி விசாலினியைப் பற்றி அறிந்த போது எமக்கு ஏற்பட்ட மகிழ்ச்சி மட்டில்லாதது. எத்தனையோ எதிர்மறை கருத்துக்களையும், தேவையற்ற செய்திகளையும் பரப்பி வரும் தமிழ் ஊடகங்கள், எம் தமிழ் தேசத்தின் பிஞ்சின் சாதனையை வெளிச்சம் போட்டு காட்டாமல் இருப்பதின் பின்ணயில் வழமையில் ஊறிப்போன வணிக புத்திகள் இருப்பதை நாம் உணராமலும் இல்லை.

சிறுமி விசாலினியின் ஐ.க்யூ எனப்படும் நுண்ணறிவின் அளவு 225 என்பது நாம் வியந்து பார்க்கும் அளவில் இருக்கிறது என்றால் இந்த சிறுவயதிலேயே அவள் செய்திருக்கும் சாதனைகள் இன்னும் அளப்பரியது. இத்தகைய நுண்ணறிவுகள் கொண்ட சிறுமி விசாலினி போற்றிப் பாதுகாக்கப்பட வேண்டிய நமது தேசத்தின் சொத்து. மத்திய மாநில அரசுகள் சரியான உதவிகளைச் செய்து மேலும் அவள் பலப்பல சாதனைகளை புரிய உதவ வேண்டும் என்ற வேண்டுகோளினை இந்தக் கட்டுரையின் மூலம் வைப்பதோடு உங்களின் அன்பையும் பாரட்டுதல்களையும் சிறுமி விசாலினிக்கு என்ற visalini2000@gmail.com மின்னஞ்சலாய் அனுப்பு வையுங்கள்.

மேலதிகமாக இவரைப் பற்றி அறிய: இங்கே அழுத்தவும்

(கழுகு இன்னும் உயரப் பறக்கும்....)

தனிமனித மாற்றமே சமுதாயத்தின் விடியல்..!

2012-01-05T15:12:00.000+05:30

நிலவின் அழகை ரசிப்பதில் இருக்கும் சுகம் ஆராய்வதில் கிடைக்குமா? மூலக்கூறுகளும், சமன்பாடுகளும், விதிமுறைகளும் கற்றிருந்தாலும் அதை மறத்தல்தான் சுகம்.

சைவ சித்தாந்தத்தை கைக் கொண்டு சிவநெறியில் வாழ்ந்து சூன்யமே சத்தியத்தின் மூலம் என்று தெளிந்த சிவவாக்கிய சித்தர் பின்னாளில் வைணவத்தை தழுவி இறைவனுக்கு உருவ வழிபாடு செய்து திருமழிசை ஆழ்வாராக மாறினார் என்று சொல்வார்கள்.

வாழ்க்கையில் தன்னின் சுயத்தை காண விரும்பும் ஒருவனுக்கு எதிரே ஒரு ஆப்ஜக்ட் தேவைப்படுகிறது. மனோபலம் உள்ளவர்கள் தன்னை உள்நோக்கும் சக்தி வந்தவுடன், தன் உடலை எது இயக்குகிறதோ அதுவே இந்த பிரபஞ்சத்தையும் இயக்குகிறது என்ற உண்மையை உணர்ந்தவர்கள் உருவங்களை கலைந்து விட்டு வெளியே வந்து விடுகிறார்கள் ஆனால் அது ஒன்றும் அவ்வளவு எளிதான செயல் இல்லை.

கடவுள் இல்லை என்று அடித்து மறுப்பவர்களில் எல்லோருமே மன திடமுடன் சொல்கிறார்கள் என்று சொல்ல முடியாது. இல்லை...இல்லை என்று சொல்லும் போது இருக்குமோ என்ற எண்ணமும் கூடவே தொடர்வது மறுக்க முடியாதது. இப்படி சொல்வதாலேயே மனதிடன் இல்லாதவர்கள் இல்லையென்றே சொல்லவும் முடியாது...

மனதிடன் - அகங்காரங்கள் அற்றது, நிலையாமை உணர்ந்தது, சக மனிதரில் தவறு செய்தவர் இருந்தாலும் மன்னித்து அரவணைத்து செல்வது, மன்னிப்பு கேட்க தெரிவது, வன்முறைகள் தேவைப்படும் இடத்தில் வன்முறைகளை தப்பாமலும், மெளனங்களில் பூரண மெளனமாயும் இருப்பது, கோபங்களை தவறுகளில் காட்டி மனிதர்களை நேசிப்பது

இப்படி சொல்லிக் கொண்டே போகலாம்.

மன திடன் = அகங்காரம் இல்லாத தன்னம்பிக்கை + அரவணைக்கும் பக்குவம் = மூல உண்மை.

ஏன் இவ்வளவு சொல்கிறேன் என்றால், பிடித்தமான விசயங்களை மனிதர்கள் செய்யும் போது அவர்களின் பிடித்தமான விசயங்களை உற்றுப் பார்த்து ஆராயாதீர்; அப்படி செய்வது ஒவ்வொருவரின் மன திருப்திக்காக மேலும் மன வலுவுக்காக.....!

அரசியலையும் இலக்கியத்தையும் பேசுவது உங்களது ஈகோவுக்குக் தீனி போடுகிறது, சுவாரஸ்யமாயிருக்கிறது என்றால் ஒரு நடிகனை நேசிப்பதும் அவனுக்காக கதறுவதும் இன்னொருவனுக்கு சுவாராஸ்யமாய் படுகிறது.

கடவுளை மறுப்பது ஒருவரின் சுவாரஸ்யம் என்றால் ஏற்பது இன்னொருவரின் சுவாரஸ்யம். உங்களுக்கு எப்படி அவர் அபத்தமாய் தெரிகிறாரோ அப்படித்தான் அவருக்கும் நீங்கள் தெரிகிறீர்கள் என்பது உங்களுக்குத் தெரியுமா?

கொஞ்சம் விசயம் தெரிந்துவிட்டால் போதும் உலகில் இருக்கும் எல்லாவற்றையும் சரி தவறு என்று நிறுவி பேசி விடலாம். இப்படி கொஞ்சம் விசயம் தெரிந்த மிகைப்பட்ட பேர்கள் உலாவும் இடமாக இணைய உலகம் இருப்பதால் எல்லோரும் தனக்கு நிறையவே தெரியும் என்று எண்ணிக் கொள்கிறார்கள்...

நான் சொல்வதே இறுதி உண்மை என்று தத்தமது அகங்காரங்களை எடுத்து உரசிக் கொள்கிறார்கள், ஆனால் உலகில் எத்தனை கோடி மனிதன் இருக்கிறானோ அத்தனை கோடி கொள்கைகளை மனம் ஏற்படுத்தி வைத்திருக்கிறது. இங்கே ஒவ்வொருவரின் வசதிக்கு ஏற்ப அதனை எடுத்து கையாளுகிறார்கள்.

கொடி பிடித்து ரோட்டில் இறங்கி ஒரு கட்சிக்காக வாழ்க, ஒழிக என்று கோசம் போடுபவனை கோவிலில் கற்பூரம் ஏற்றி சாமி கும்பிடுபவன் முட்டாள், பைத்தியக்காரன் என்று சொல்கிறான், கற்பூரம் ஏற்றி சாம்பி கும்பிடுபவனை எனக்கு உலக அரசியல் எல்லாம் தெரியும் இவன் என்ன முட்டாளாக இருக்கிறானே என்று கொடி பிடிப்பவன் நினைக்கிறான்.

இதுதான் மாறி மாறி நிகழ்ந்து கொண்டிருக்கிறது. இவையெல்லாம் கடந்து வர வாழ்க்கையின் அனுபவங்களின் மூலம் புலன் மயக்கத்தால் தோன்றும் மமதைகளை விட்டொழிக்க வேண்டியிருக்கிறது. கூவி, கூவி பேசுகிறார்கள், விரல் நுனியில் உலக விசயங்களை ஒரு இயந்திரத்தைப் போல ஒப்பிக்கிறார்கள். நான் யார் தெரியுமா? என்று கொக்கரிக்கிறார்கள்...இவன் செய்தது சரியில்லை என்று ஒரு கூட்டம் குதிக்கிறது அவன் சொல்வது சரியில்லை என்று ஒரு கூட்டம் குதிக்கிறது.

மொத்தத்தில் எல்லாமே அபத்தங்களின் கூட்டாய் ஒரு சர்க்கஸ் கூடாரத்தின் கோமாளிக் கூத்தாய் வெளிப்படுகிறது. அதிகம் புத்தகம் வாசித்தவன் அதிகம் விசயங்கள் தெரிந்தவன் அடங்கியிருக்க வேண்டாமா? இவன் புத்தியை அறியாதவர்களிடம் காட்டி கொக்கரிக்கவா பயன்படுத்துவது? பண்படு என்பதிலிருந்து வந்ததுதானே பண்பாடு என்ற சொல். கல்வி பண்பை கொடுக்க வேண்டாமா? மாறாக அகங்காரத்தை கொடுத்தால் கற்றது கல்வியா?

உவப்ப தலை கூடி உள்ளப் பிரிய வேண்டாமா? உவப்பத் தலை கூடத் தெரியவில்லை எனில் நீ என்ன புலவர்? உம்மிடம் உள்ளது என்ன புலமை? நீ என்ன கல்விமான்?

மனிதராய் பிறந்து விட்டால் ஏதேனும் ஒரு நிலைப்பாடு எடுத்து ஒரு சித்தாந்த கொட்டிலுக்குள் அடைபட்டு வாழ வேண்டுமென்ற பொது புத்தியில், எனக்கு எந்த நிலைப்பாடுமில்லை, உமது கூச்சல்கள் எல்லாம் எமக்குத் தேவையுமில்லை என்று ஒதுங்கி கூட இருக்க விடுவதில்லை ஆணவத்தை மனமாகக் கொண்ட மனிதர்கள்....

நீ கருத்து சொன்னாயா நீ இப்படிப்பட்டவன், சொல்லவில்லையா அப்படிப்பட்டவன், மெளனமாய் இருக்கிறாயா நீ ஒரு கோழை என்று விமர்சனங்களை நம்மை நோக்கிப் பாய்ச்சும் மடைமைகளின் பின்னால் ஒரு விலங்கின் புத்திதானே இருக்க முடியும்?

காலம் காலமாக அறிவினை உணர்ச்சியைத் தூண்டுவதற்கே பயன்படுத்தி பயன்படுத்தி மழுங்கிப் போய் கிடக்கிறது நமது சமுதாயம் மாறாக அறிவினை கொண்டு நமது உள்ளுணர்வை எழுப்பும் ஒரு பயிற்சி பற்றி யாருக்கும் தெரியாது. உள்ளுணர்வு விழித்தால் எதிராளியின் உள்நோக்கம் தெரியும், எதிராளியின் தவறுகள் புரியும், தவறுகள் புரிந்த பின் அவரிடம் எப்படி சண்டையிட மனம் வரும்?

புரிதல்களின்றி வழியைத் தவறவிட்ட ஒரு மனிதனை வழிகள் தெரிந்த மனிதன் தண்டித்தலும், எள்ளி நகையாடுதலும், எப்படி சரியான வழிமுறையாகும்? வழியற்றவனின் வாதங்களை எல்லாம் கொண்டு கோபம் கொண்டால் வழியை அறிந்திருந்தும் நாம் மூடர் தானே? முரண்களற்றது அல்ல வாழ்க்கை அதே நேரம் எல்லோரும் எல்லாமும் அறிந்திருப்பர் என்று எதிர்பார்த்தலும் சரியன்று.....

புரியாத மனிதர்களின் கோபங்களில் அவரை சரிசெய்ய முனையாதீர். காத்திருங்கள் சரியான தருணத்திற்காக, சரியான தருணத்தில் உமது தெளிவினை ஒரு கூர்வாளை நெஞ்சில் இறக்குவது போல இறக்கியே விடுங்கள். தெரிந்தவன் தெரியாதவன் என்று எல்லோரும் ஒரே இயல்பினன் தான்....சூழல்கள் விதைத்த பாடங்களில் மூளைகள் இடமாறி அவர்களை சிந்திக்க வைத்திருக்கலாம்....

நான் சரியானவன் என்று ஏகபோக உரிமை கொண்டு உரக்க உரக்க சப்தமிட்டு கூட்டத்தை கூட்டி தன் புஜ பலம் காட்டுபவன் முட்டாள்....

அன்பால் தன் புரிதலை வெளிப்படுத்தி, சத்தியத்தை மூளைகளுக்கு ஏற்றி தமது செயலால் சுற்றியிருப்பவர்களை கவர்பவன் ஞானி....!

ஞானிகள் முக்காலமும் போற்றப் படுவார்கள்!!!!

கழுகு

(கழுகு இன்னும் உயரப்பறக்கும்)

டீக்கடை பெஞ்ச்....! சூடான அரசியல் இங்கு கிடைக்கும்... (4.1.2012)

2012-01-04T12:07:00.003+05:30

டீ கடையில் தனியாக நின்று கொண்டிருந்த கனகு, நெடு நாட்களுக்குப் பிறகு ரெங்கு வருவதைப் பார்த்தார்..

கனகு : என்னய்யா ரெங்கு ஆளையே காணோம் எங்க போய் இருந்த... புது வருசத்துக்கு ஏதாவது காசி ராமேஸ்வரம் போயிட்டியா..??

ரெங்கு : அட நீ வேறப்பா! நானே மாமியார் வீட்டுக்கு போய்ட்டு.... இருந்த பணமெல்லாம் இப்படி செலவாகிடுச்சேன்னு நொந்து போய் வந்திருக்கேன்.

கனகு : அட செலவா..? அதுவும் நீ பண்ணுனியா..!! சரி சரி மாமியார் வீட்டுல என்ன பரிசு கொடுத்தாங்க

ரெங்கு : ஆமா ” பரிசு" இப்போ அதுதான் ஒரு குறைச்சல்.. நானே புயல்ல மாட்டி பீதியாகி வந்து இருக்கேன்.. இதுல பரிசு வேறயா..??

கனகு : சரி சரி நீ எவ்வளவு செலவு பண்ணியோ அதை அம்மா கிட்ட கேட்டு வாங்கிக்கோ.. அவங்க தான் 800 கோடி ஒதுக்கி இருக்காங்களே...

ரெங்கு : ஆமா அம்மா ஒதுக்கிட்டாங்க ஆனா நம்ம மக்கள் கையில போக்கும் போது அது 500ரூபாய் தான் போய் சேரும்.. என்ன பண்றது..??

கனகு : ஆமா ஆமா சாமி வரம் கொடுத்தாலும் நம்ம பூசரிங்க வரம் தரமாட்டாங்க..!! சரி சரி இனி உங்க மாமியார் வீட்டுக்கு போக மாட்டேன் சத்தியம் பண்ணு...

ரெங்கு : அடப்பாவிங்களா இந்த வருஷம் என்ன? எல்லாம் சத்தியம் பண்ணு... சத்தியம் பண்ணுன்னு திரியுறீங்க.

கனகு : யாருப்பா அது கனக விட அறிவாளி இந்த உலகத்துல..

ரெங்கு : அட உனக்கு தெரியவே தெரியாதா.. எல்லாம் நம்ம ராமதாஸ் அண்ணாச்சி தான் சத்தியம் வாங்குறார்.. தன் கட்சில சேரும் புதிய உறுப்பினர்களிடம் பாமகவுக்கு தான் ஓட்டு போடணும்னு குல தெய்வம் மேல சத்தியம் வாங்குறாராம்..

கனகு : இதுக்கு மேல இவங்க கட்சிகாரங்கள யாராலும் அசிங்கப்படுத்த முடியாது...இனி யாரயும் இவர் கட்சில சேர விடக் கூடாதுன்னு முடிவு பண்ணிட்டார் போல... எதிர்க்கட்சிகாரன் பார்த்தா என்ன நினைப்பான்...

ரெங்கு : இவரே சத்தியம் வாங்குறேன்னு சொல்லிக்கிட்டு எல்லோரையும் கட்சியவிட்டு துரத்திடுவார் போல

கனகு : ஆமா ஆமா துரத்துறார்.. எல்லோரும் போய் வேல் முருகன் கட்சில சேருங்கப்பா..

ரெங்கு : அம்மாவுக்கு ரொம்ப நல்ல மனசுப்பா! புது வருஷம் அதுவுமா போனஸ் எல்லாம் கொடுத்துட்டாங்க

கனகு : ஆமா ஆமா கொடுத்துட்டாங்க கஜானா காலியா இருக்கு... தமிழ்நாடு அரசுத்துறை திவால் ஆகிடும்னு சொல்லிட்டு.. மக்கள் மண்டையில கொட்டி, அந்த ரத்தத்தை எடுத்து போனஸ் கொடுக்குறாங்க..

ரெங்கு : அதெல்லாம் விடுய்யா மக்கள் நலப் பணியாளர்களுக்கு எல்லாம் போனஸ் கொடுத்து இருக்காங்க ரொம்ப பெரிய மனசு தானே..??

கனகு : ஆமா ஆமா! ரொம்பப் பெரிய மனசு தான்... ஒரு நாள் வந்து, அவங்க வேலையே செய்யலயே ஏன் வேலைக்கு வைச்சு இருக்கணும்னு கேட்பாங்க.. ஹ்ம்ம்ம்...அவராவது வேலை செய்யாதவங்களுக்கு சம்பளம் மட்டும் தான் கொடுத்தார், இவங்க போனஸும் சேர்த்து கொடுத்திட்டாங்க.. இன்னைக்கு போனஸ் நாளைக்கு..?? உசாரய்யா உசாரு

ரெங்கு : புத்தாண்டு அன்னைக்கு டாஸ்மார்க் கடைய திறந்து போட்டுட்டு, சரக்கு வித்த பணத்தை எல்லாம் விட்டுட்டு சரக்கு அடிச்சிட்டு போய்ட்டாங்க டாஸ்மார்க் ஊழியர்கள்.. அரசு துறை எப்படி எல்லாம் வேலை செய்யுதுனு, பாருய்யா கனகு

கனகு : என்ன கடைய திறந்து போட்டுட்டு போயிட்டாங்களா... சரக்கு சும்மா கிடைச்சா குளிச்சுட்டே போவானுங்க.. நம்ம ஏரியாவில் இருக்கும் கடையும் இருக்கே என்னைக்காவது இப்படி திறந்து போட்டுட்டு போறாங்களா நமக்கு வசதியா இருக்கும்..

ரெங்கு : என்ன ஒரு ஆசையா உனக்கு... ஏற்கனவே அரசுத்துறை எல்லாம் ஆடிட்டு இருக்குன்னு அம்மா சொல்றாங்க.. இதுல இப்படியா..??

கனகு : ஓஹோ... அரசுத்துறை ஆடுதுன்னு சொன்னது இது தானா? இப்படி தான் எல்லா அரசுத்துறையும் ஆடுதா.. ஐயோ ஐயோ.. எல்லா கடையும் திறந்து வையுங்கப்பா மக்களுக்கு 142 கோடி கிடைக்கும்.

ரெங்கு : ஜெயலளித்தாக்கு பரதம் சொல்லி கொடுத்தவங்க இறந்து போய்ட்டாங்களாம் கனகு உனக்கு தெரியுமா..??

கனகு : ஆமா நாட்டுக்கு ரொம்ப தேவையான செய்தி பாரு.. போய்யா உன்ன மாதிரி எடிட்டர் எல்லாம் இருக்குறதால தான் இப்படி நியூஸ் வருது... விசைத்தறி தொழிலாளர்கள் எல்லாம் வேலை நிறுத்தம் செய்றாங்க அத பத்தி ஏதாவது சொன்னியா யா?

ரெங்கு : ஆமா கனகு சம்பள உயர்வு, மின்வெட்டு மாதிரியான காரணத்துகாக அவங்க வேலை நிறுத்தம் செய்றாங்களாம்..

கனகு : இப்படி பட்ட செய்திய மக்களுக்கு சொல்லுய்யா ரெங்கு.. உன்ன எடிட்டர்ன்னு ஒத்துக்குறேன். அதைவிட்டுட்டு அந்த அம்மா பாதுகாப்பு அதிகாரிய மாத்துறது, அமைச்சரை மாத்துறதுன்னு நியூஸ் சொல்ற.. உன் நியூஸ் வரும் போது அந்த ஆளையும் மாத்தி இருப்பாங்க அந்த அம்மா... போய்யா போ ஒழுங்கான நியூஸ் போடு

ரெங்கு : சரி சரி டென்சன் ஆகாத கனகு ரொம்ப நாளைக்கு அப்பறம் வந்து இருக்கேன் டீ சொல்றேன் குடிக்கிறியா .??

கனகு : அதையாவது உருப்படியா சொல்லுய்யா..

கழுகு

(கழுகு இன்னும் உயரப்பறக்கும்)

கருத்துக் கந்தசாமிகளே..உஷார்..! ஒரு விழிப்புணர்வு பார்வை!

2012-01-02T12:42:00.001+05:30

அத்து மீறி அடுத்தவர் வாழ்க்கையிலும் விருப்பு வெறுப்பிலும் மூக்கு நுழைத்து கருத்துக்களை திணிப்பது நமது கலாச்சாரமாய் ஆகிவிட்டது என்று கூட சொல்லலாம்...! பக்கத்து வீட்டுக்காரன் என்ன சம்பாதிக்கிறான்...அவன் பையன் +2 வில் எத்தனை மார்க்? அவரது மகள் யாரையும் காதலிக்கிறாளா.. என்று எத்தனை எத்தனை அத்துமீறல்கள் நடக்கின்றன நமது சமுதாயத்தில்...!

தன்னைப்பற்றி சிந்திக்க திராணியில்லாமல் தான் தோன்றித்தனமாக அடுத்தவரை பற்றி சிந்திக்கவும் விமர்சனம் செய்யவும் ரொம்ப வசதியாய் பழகிக் கொண்ட ஒரு வக்கிரபுத்திதான் அடுத்தவன் கதை பேசுவது..... அது அலுவலகம் ஆகட்டும் டீக்கடை ஆகட்டும்... வீட்டு வாசலில் அமர்ந்து பேசும் பெண்களாகட்டும், குழாயடியில் தண்ணீர் பிடிக்கும் அந்த நேரத்தில் பத்து வீட்டு சமாச்சாரத்தை பலகாரம் செய்யாவிட்டால் இவர்களுக்கு தூக்கம் வராமல் போனது வியாதியா? இல்லை சமுதாயத்தை பிடித்துள்ள பிணியா?

நண்பர்கள் கூட்டத்தோடு பேசிக் கொண்டிருந்த ஒரு கல்லூரி விடுமுறை தினத்தில் ஒரு பெண் அவளுக்குப் பிடித்த ஆடையை...ஒரு ஸ்கர்ட்டும் டி-சர்ட்டும் அணிந்து கொண்டு தன்னுடைய கணவனுடன் ரோட்டில் செல்கிறாள்.. கையிலும் இடுப்பிலுமாக இரண்டு குழந்தைகள் ...பக்கத்தில் இருக்கும் நண்பர் ஒருவர் சொல்கிறார்....ஒரு கேவலமான வார்த்தையை கூறி இவள் கண்டிப்பாய் அப்படி பட்டவள் என்று அடித்து சொல்வேன் என்று...... !

ஏன் அவள் உடுத்தி செல்லும் ஆடை அவளது கணவனுக்கு ஒத்துக் கொள்கிறது....அவளும் அது பற்றி ஒரு அக்கறை இல்லாமல் சாதரணமாய் அந்த பெண்ணும் சென்று விட்டாள் ஆனால் சமுதாயம் அது பற்றி ஒரு பார்வை வைத்திருக்கிறது....இப்படி உடுத்தினால் இப்படி பட்டவள் ...அப்படி உடுத்தினால் அப்படிபட்டவள் என்று அடுத்தவரின் பிரைவசி என்று சொல்லக்கூடிய தனி உரிமையில் அத்து மீறி நுழைந்து ஆர்ப்பாட்டமாய் சோபா போட்டு உட்கார்ந்து கொள்வது என்று அத்துமீறல் தொடர்ந்து கொண்டிருக்கிறது.

பல நேரங்களில் திரையில் தோன்றும் நட்சத்திரங்களின் சொந்த வாழ்க்கையில் தனது மூக்கை நுழைத்து மீடியாவும் காசு பார்த்து இருக்கிறது. அரசியல்வாதிகள் கூட கருத்துப்போரை மறந்து அடுத்தவரின் சொந்த வாழ்க்கையினை விமர்சிக்கும் போக்கில்தான் பெரும்பாலும் ஆர்வம் காட்டி இருக்கிறார்கள். அடுத்தவன் வாழ்க்கை பற்றி .. ஏன் இவ்வளவு அக்கறை நமது மக்களுக்கு? ஒருவனின் சொந்த விசயங்கள் அடுத்தவனையோ அல்லது சமுதாயத்தையோ பாதிக்காத போது திரையை விலக்கிப்பார்த்து உள்ளே இருக்கும் விசயங்களை விமர்சிப்பது....அநாகரீகம் என்று எப்போது இந்த சமுதாயம் உணரும்?

கணவன் மனைவியாய் இருந்தாலும்...அல்லது பெற்றோர் குழந்தைகளாய் இருந்தாலும் சரி... நட்பு வட்டாரமாய் இருந்தாலும் சரி... அவர் அவருக்கு இருக்கும் அந்த வெற்றிடத்தை அவர்களின் சந்தோசத்தை கலைக்க முயலாமல்....அந்த வெற்றிடத்தால் அவர்களுக்கும் மற்றவர்களுக்கும் தொந்தரவு ஏதும் இல்லை எனும் பட்சத்தில் அதை ரசித்து அல்லது பிடிக்கவில்லையெனில் விலகி வாழ்ந்தால் எவ்வளவு சுகமாயிருக்கும்!

அத்துமீறலும் அனுமதியின்றி நமக்கு எது தேவையென அடுத்தவர் கூறுவது...... நமக்கு பிடித்ததை விமர்சிப்பது..மற்றவருக்கு பிடித்ததை நம் மீது திணிப்பதும் வலியுறுத்துவது....உடனடியாக யாரும் நிறுத்தப் போவதில்லை...இருந்தாலும்...இந்தக் கட்டுரை அதற்கான முயற்சியை செய்திருக்கிறது என்ற மட்டில் கட்டுரையை நிறைவு செய்கிறோம்.

கழுகிற்காக
தேவா S

(கழுகு இன்னும் உயரப்பறக்கும்)

ரங்கனின்.....ரிலாக்ஸ் பக்கம்...! விழிப்புணர்வுத் தொடர் II

2011-12-30T11:25:00.005+05:30

நீ உன் பெற்றோர்களை கொல்லாதவரை..நீ சுதந்திரமடைய முடியாது- புத்தர்

அதிர்ச்சியாக இருக்கிறதா? இருக்கத்தானே செய்யும்.. ஆனால், புத்தர் ஏன் அப்படி சொல்லி இருக்கிறார் என்று யோசித்தால் விஷயங்கள் புரிபடும். நீங்கள் இப்போது வருத்தப்பட்டுகொண்டிருக்கும் 99 சதவிகித விஷயங்கள் உங்களுக்கானதே அல்ல. அது எதோ ஒருவகையில், உங்கள் பெற்றோர்கள் உங்களிடம் சிறுவயதிலிருந்தே திணித்த எண்ணங்கள் தான். அதாவது, அவர்களின் எண்ணங்களை சரிவர நிறைவெற்ற முடியவில்லையே என்றுதான் நீங்கள் வருந்திகொண்டிருக்கிறீர்களே தவிர..அது உண்மையில் உங்களுடைய சொந்த எண்ணமாய் இருப்பதற்கு 1 சதவிகிதம் மட்டுமே வாய்ப்பிருக்கிறது.

இன்னும் ஆழமாய் போவோம்.. ஒரு குழந்தை பிறக்கும்போது, அது ஒரு வெறும் வெள்ளைத்தாளாய் தூயமனத்தோடு பிறக்கிறது. அதனால்தான் குழந்தைகளிடம் அவ்வளவு கவர்ச்சி. அப்படி தூயமனத்தோடு பிறக்கும் குழந்தைகள் தன்னகத்தே ஏகப்பட்ட தனித்தன்மையையும், திறமைகளையும் கொண்டிருக்கும். அதை எல்லாம் வெளிகொண்டுவர முடியாதபடி, நம் பெற்றோர்களும், சமுதாயமும் அவர்களை அடக்கி, முடக்கிப்போட்டு, அவர்களை மிரட்டி, தங்கள் கருத்துக்களை திணித்து, அந்த கருத்துக்களை மீறும்போது, அவர்களை கண்டித்து தண்டித்து, அவர்களின் வெள்ளைத்தாளில் கிறுக்கித் தள்ளிவிடுகிறார்கள்.

அவர்களுக்கு வீடு வாங்க ஆசை- உங்களிடம் திணித்தாயிற்று. அவர்களுக்கு படாடோபமாய் வாழ ஆசை- உங்களிடம் திணித்தாயிற்று. அவர்களுக்கு பெரிய சம்பளங்களில், கௌரவங்களில் ஆசை- உங்களிடம் திணித்தாயிற்று. அவர்களுக்கு அழகழகான ஆடைகளில் ஆசை- உங்களிடம் திணித்தாயிற்று. அவர்களுக்கு வாழ்க்கை மீது பயம்- உங்களிடம் திணித்தாயிற்று.

அவர்களின் இயலாமையால், அவர்களின் கருத்துக்களை உங்கள்மீது திணித்துவிடுகிறார்கள். இப்போது, அவர்களின் ஆசைகளை உங்கள் ஆசை என்று நம்பிக்கொண்டு, நீங்கள் வாழ்வோடு போராடுகிறீர்கள், உங்களாலும் முடியவில்லையா? எதற்கு இருக்கின்றன பிள்ளைகள்.. திணி..அதுவும் பைத்தியமாய், திணித்ததை தன்னுடையது என்று நம்பி திரியட்டும்.

இப்படி, திணிக்கப்பட்ட கருத்துகளுக்காக ஓடியதில் ஒரு சிலர், திடீரென்று நின்று நிதானித்து, தங்களின் நிஜமான முகத்தை கண்டுகொண்டனர். தான் ஒரு வெள்ளைத்தாள் என்பதையும், தன்மீது பெற்றோர் உட்பட அனைவரும் கிறுக்கிதள்ளி இருக்கிறார்கள் என்பதையும் கண்டுகொண்டனர். அப்படிப்பட்டவர் சொன்னதுதான் அந்த முதல் வரி.

அதற்காக நிஜ தந்தைதாயை கொல்ல சொல்லவில்லை. அதில் ஒரு லாபமுமில்லை. அவர் உங்களுக்குள் இருக்கும் அவர்களின் திணிக்கப்பட்ட எண்ணங்களை கொல்லச் சொல்கிறார். அப்படி அந்த கிறுக்கல்களை அழித்தாலே ஒழிய..நீங்கள் நிம்மதியடைய முடியாது.

இப்படி, தன்னுடைய சுயநலத்திற்காக, உங்களை கொஞ்சம் கொஞ்சமாய் உறிஞ்சிக்கொண்டிருக்கும் அவர்களின் எண்ணங்களில் இருந்து விடுபடுங்கள். உங்களுக்கான ஒரு வாழ்வை வாழுங்கள்..

உங்கள் கடைசி மூச்சுவரை, இயற்கை அன்னை உங்கள் மீது நம்பிக்கையோடு இருக்கிறாள். நீங்கள் உங்கள் சொந்த இயல்புக்கு திரும்பிவிடுவீர்கள். நீங்கள் உங்களுக்கான ஒரு வாழ்வை சிறப்பாக வாழ்வீர்கள் என்ற நம்பிக்கை..நம் உயிர்பிரியும் அந்த கடைசி கணம் வரை அவளுக்கு இருக்கிறது. அப்போதும் நீங்கள் இதை உணரவில்லை என்பதால்..சோகமாய் உங்களிடமிருந்து விடைபெறுகிறாள்.

கழுகிற்காக
உங்கள் ரங்கா

(கழுகு இன்னும் உயரப் பறக்கும்....)

அலைபேசி சேவைகளின் பயன்பாடுகள்....! ஒரு உஷார் ரிப்போர்ட்...!

2011-12-27T23:37:00.009+05:30

அலைபேசி என்பது இன்று இன்றியமையாத ஒன்றாகிவிட்டது. நம் நாட்டின் மக்கள் தொகையில் கிட்டதட்ட 70 கோடிக்கும் அதிகமான அலைபேசிகள் புழக்கத்தில் உள்ளன. இதில் எவ்வளவோ நன்மைகள் இருந்தும் இதனால் ஒரு சில பிரச்சினைகள் இருக்கத்தான் செய்கின்றன. அதில் மிக முக்கியமானது. தேவை இல்லாமல் பணம் எடுப்பது. எந்த ஒரு நிறுவனமும் இதற்கு விதிவிலக்கு அல்ல. ஆனால் இதை எப்படி தடுப்பது என்று நிறைய பேருக்கு தெரியவில்லை.

இதை தடுப்பது எப்படி என்பதை விட வந்த பின் காப்பது எப்படி என்பதே பெரும்பாலும் நிறைய பேருக்கு தேவையாய் இருக்கும். ஒவ்வொரு அலைபேசி நிறுவனத்துக்கும் முன்பு தனி தனி வாடிக்கையாளர் சேவை தொடர்பு எண் இருந்தது. இப்போது ட்ராய் ஆனது அவை எல்லாவற்றையும் ஒருங்கிணைத்து உள்ளது. இதன் மூலம் வாடிக்கையாளர் சேவை மைய அதிகாரியை தொடர்பு கொள்ள 121-ம், ஏதேனும் புகார் அளிக்க வேண்டும் என்றால் 198-ம் அறிவிக்கப்பட்டு உள்ளது. இதை எப்படி பிரித்துப் பார்ப்பது?

இங்கே புகார் என்பது உங்கள் பேலன்ஸ் தொகையில் ஏதேனும் ஒரு காரணத்துக்காக பணம் ஏதேனும் எடுத்து இருந்தால், அல்லது வேறு ஏதேனும் பிரச்சினை (நெட்வொர்க் பிரச்சினை, SMS/Call பிரச்சினை, இது போல) என்றால் நாம் 198 ஐ தொடர்பு கொள்ளலாம். அதே சமயம் ஏதேனும் ஒரு விஷயம் பற்றி கேட்க வேண்டும் என்றால் நாம் 121 ஐ தொடர்பு கொள்ள வேண்டும். உதாரணம்: GPRS pack ரீசார்ஜ் செய்ய எவ்வளவு? எனக்கு இதற்கு valdity எவ்வளவு நாள் உள்ளது? என்பது போன்று. அனைத்து நிறுவனப் பயனர்களுக்கும் இது பொதுவானது.

காலர் ட்யூன்/ஹலோ ட்யூன் எனபதற்கு தான் அதிகமாக எடுக்கப்படும் எந்த ஒரு நிறுவனமும் இதை ஃபோன் கால் மூலமே ஆக்டிவேட் செய்கின்றன. இதற்கு அடுத்து ஏதேனும் ஒரு சர்வீஸ் Voice Call அல்லது SMS க்கு இதற்கும் Call தான். எனவே முதலில் எந்த எண்ணில் இருந்து இதற்கான அழைப்பு வருகிறது என்று கவனியுங்கள், பெரும்பாலும் ஒரே எண் அல்லது ஒரே எண்ணில் தொடங்கும் பத்து இலக்க நிறுவன எண் அல்லது வேறு ஏதேனும் 6 அல்லது 8 இலக்க எண். வந்தால் உங்கள் முதல் கடமை அதை Cut செய்வது. சில நிறுவனங்கள் Attend செய்த உடனேயே குறிப்பிட்ட சேவையை ஆக்டிவேட் செய்கின்றன. ஆனால் நாம் தொடர்பு கொண்டு கேட்டால் நீங்கள் ஏதேனும் ஒரு எண் Press செய்ததே இதன் காரணம் என்று சொல்வார்கள். எனவே இந்த விஷயத்தில் குறிப்பிட்ட எண்ணை கவனித்து Cut செய்வது நலம்.

இப்போது ஏதோ ஒரு காரணத்தை முன்னிட்டு உங்கள் கணக்கில் இருந்து பணம் தவறுதலாக எடுக்கப்பட்டு இருந்தால் அதை தவிர்ப்பது எப்படி என்று பார்ப்போம். பெரும்பாலும் அனைத்து நிறுவனங்களும் உங்கள் கணக்கில் இவ்வளவு பணம் எடுத்துள்ளோம் என்று ஒரு குறுஞ்செய்தி அனுப்பி தான் தெரிவிப்பார்கள். நாமும் கூட எடுத்துள்ள தொகையினை அறிந்து கொள்வது இதன் வாயிலாகத் தான். சிலர் என்ன இது என்ற கோபத்தில் அந்த செய்தியை டெலீட் செய்து விடுவார்கள். ஆனால் அவ்வாறு செய்வது கூடாது. நம் கணக்கில் பணம் எடுத்துள்ளது தவறாக தான் எனும் பட்சத்தில் இதன் மூலமே நாம் நம் பணத்தை திரும்பப் பெற முடியும். எனவே முதலில் அதை நீக்காமல் வைத்து இருக்கவும். இப்போது எடுத்து இருந்தால் அதை திரும்ப பெறுவது எப்படி அல்லது, அதை Deactivate செய்வது எப்படி என்று பார்ப்போம்.

ஏர்டெல்லில் மட்டும் இதனை நாம் வாடிக்கையாளர் சேவை மைய அதிகாரியை தொடர்பு கொள்ளாமல் குறிப்பிட்ட வசதியை நிறுத்த முடியும். இதற்கு “STOP” என்று 121 என்ற எண்ணுக்கு குறுஞ்செய்தி அனுப்ப வேண்டும். உடனடியாக பதில் கிடைக்கும். என்ன வசதி நீங்கள் ஆக்டிவேட் செய்து உள்ளீர்கள் என்று. அதற்கு “STOP SERVICE NAME” என்று அனுப்புவதன் மூலம் நிறுத்த முடியும். (அல்லது உங்களுக்கு என்ன பதில் வருகிறது அதிலேயே அவர்கள் Stop செய்வதற்கான வழியும் சொல்லி இருப்பார்கள்). இதிலும் இல்லாமல் இருந்து பணம் எடுத்து இருந்தால் நீங்கள் வாடிக்கையாளர் சேவை மைய அதிகாரியை தொடர்பு கொள்ளலாம்.

அதற்கு முன் உங்கள் கணக்கில் உள்ள தொகை எவ்வளவு என்று தெரிந்து கொள்ளவும், பணம் எடுப்பதற்கு முன் எவ்வளவு இருந்தது என்பதை நினைவு படுத்தி பார்க்கவும். தெரியாவிட்டாலும் பிரச்சினை இல்லை. 198 க்கு அழைத்து இதை சொன்ன பிறகு, அவர்கள் இந்த விஷயத்தை மறுத்தால் உங்களிடம் உள்ள குறுஞ்செய்தி மூலம் அதை அவர்களிடத்து சொல்லலாம்.
சில சமயம் உடனடியாக உங்கள் பணம் உங்கள் கணக்கில் திரும்ப தரப்படும். உடனடி தீர்வு இல்லை என்றால் உங்களுக்கு ஒரு புகார் எண் தரப்படும் அதை வைத்து மீண்டும் அடுத்த முறை இந்த விசயத்துக்கு தொடர்பு கொள்ளும் போது இதை சொல்வதன் மூலம் அவர்கள் ரெகார்ட்களில் இருந்து உடனடியாக கவனிப்பார்கள். இல்லை என்றால் திரும்பவும் ஆரம்பத்தில் இருந்து ஆரம்பிக்க வேண்டும்.

அலைபேசி மூலம் இணையம் பயன்படுத்தும் நண்பர்கள் முக்கியமாக கவனிக்க வேண்டிய விஷயம் நீங்கள் எந்த செட்டிங்ஸ் ஆக்டிவேட் செய்து இணையத்தை பயன்படுத்துகிறீர்கள் என்று. ஒவ்வொரு நிறுவனமும் இரண்டு வகையான செட்டிங்ஸ் வைத்து இருக்கும். அதில் ஒன்று மட்டுமே இலவச வசதி உள்ளதாக இருக்கும். (இணையத்துக்கு என்று தனியாய் ரீசார்ஜ் செய்து இருந்தாலும் அவர்கள் தளத்தை வேறு தளம் செல்வதற்கு கட்டணம் எடுப்பார்கள்). உதாரணம்: ஏர்டெல்- ஏர்டெல் லைவ் மற்றும் மொபைல் ஆஃபிஸ். இதில் மொபைல் ஆஃபிஸ் தான் எல்லா இடத்திலும் ஆக்டிவேட் செய்யப்பட்டு இருத்தல் அவசியம். இதில் சந்தேகம் இருப்பின் நண்பர்கள் அல்லது 121 அழைத்து கேட்கலாம்.

உங்கள் இணைய கணக்கில் உள்ள மீதத் தொகை, நாட்கள் அறிய:
Airtel - star 121 star 10#
Tata Docomo - star 111 star 1#
Aircel - star 111 star 10#

மற்றவை பற்றி தெரிந்தவர்கள் கீழே பகிரலாம்

அடுத்து சில நிறுவனங்களில் நாம் செய்யும் இ-ரீசார்ஜ் களுக்கும் Auto Activation என்ற முறையில் மாதா மாதம் உங்கள் கணக்கில் இருந்து பணம் எடுப்பார்கள். எனவே அவ்வாறு எடுத்து இருந்தால் உடனே சேவை மைய அதிகாரியை தொடர்பு கொண்டு அதை Deactivate செய்வது உத்தமம். இது தேவை என்றாலும் நமக்கு நட்டமே. 50 ரூபாய் ரீசார்ஜ்க்கும், உங்கள் கணக்கில் எடுக்கப்படும் 50 ரூபாய்க்கும்(ரீசார்ஜ் 65 என்பது உத்தேச மதிப்பு) வித்தியாசம் உள்ளது. இந்த பாதிப்பு Reliance பயன்படுத்துபவர்களுக்கு அதிகம். #அனுபவம்.

சரி எல்லாமே சரியாக உள்ளது ஆனாலும் தொகை திரும்ப வழங்கப்படவில்லை என்றால் நீங்கள் நுகர்வோர் கோர்ட்டில் இதனை முறையிடலாம். உங்களுக்கு வந்த ஒரு குறுஞ்செய்தி போதும் இதற்கு. மேலும் பலத்துக்கு நீங்கள் சேவை மைய அதிகாரியை தொடர்பு கொண்டு பேசும் போது அதை ரெகார்ட் செய்து கொள்ளலாம். (அந்த வசதி இருந்தால்). இல்லை என்றாலும் பிரச்சினை இல்லை, நீங்கள் தொடர்பு கொண்டு பேசுவதை அவர்களும் ரெகார்ட் செய்வார்கள் எனவே அதை கொண்டும் நீதிமன்றத்தில் முறையிட முடியும். இதனால் நஷ்ட ஈடு, வழக்கு செலவு எல்லாமே குறிப்பிட்ட நிறுவனம் தரும். சமீபத்தில் ரிலையன்ஸ் ஒரு பெண் ஒருவருக்கு இது போன்ற புகாரின் அடிப்படையில் நஷ்ட ஈடு கொடுத்து உள்ளது.

இல்லை உங்களுக்கு அந்த நிறுவனம் பிடிக்கவில்லை வேறு ஒன்றுக்கு மாற வேண்டும் என்றால் MNP (Mobile Number Portability) பயன்படுத்தலாம். இதற்கு PORT”PORT Mobile Number” என்பதை 1900 என்ற எண்ணுக்கு அனுப்ப வேண்டும். உங்களுக்கு ஒரு UniqueUnique Identity Number கிடைக்கும். இப்போது நீங்கள் மாற விரும்பும் அலைபேசி நிறுவன வாடிக்கையாளர் சேவை அலுவலகத்துக்கு சென்று உங்கள் புகைப்படம், முகவரி சான்று உடன் கொடுக்க வேண்டும்.

இதெல்லாம் முன்னமே தெரிந்தவர்கள் நிறைய பேர் இருக்கலாம். தெரியாதவர்களுக்கு தான் இந்தப் பதிவு. நான் பார்த்தவரை இந்த ஒரே சேவை மைய எண்ணை பற்றியே தெரியாதவர்கள் நிறைய பேர் உள்ளார்கள். அதே போல MNPயும் கூட எனவே இதை தெரியாதவர்களிடம் கொண்டு சேருங்கள். MNP பற்றி அறிய இந்தச் சுட்டியை http://ethirneechal.blogspot.com/2011/01/mnp.html அழுத்தி தெரிந்து கொள்ளவும்.

கழுகிற்காக
பலே பிரபு

(கழுகு இன்னும் உயரப் பறக்கும்...)

ரங்கனின்.....ரிலாக்ஸ் பக்கம்...! புதிய விழிப்புணர்வுத் தொடர்..

2011-12-23T08:48:00.010+05:30

எமது சிறகடிப்பில் பல்வேறு கோணங்களையும் வாழ்க்கைப் பாடங்களாக்கி அந்த அனுபவச் செறிவுகளை எமது வாசகர்களுக்கு எப்போதும் தெளிவான பார்வைகளாக்கியே வைக்கிறோம். விழிப்புணர்வு என்ற வார்த்தையை உச்சரித்த உடனேயே அது எமக்கு இல்லை மற்றவர்களுக்கு என்று ஒவ்வொரு மனமும் பளீச் சென்று ஒரு நாடகமிட்டுக் கொள்கிறது.

அரசியல், ஆன்மீகம், சினிமா, கலை, பொருளாதாரம், கல்வி, வணிகம் என்று எல்லா துறைகளிலுமே விழிப்புணர்வு என்ற ஒன்று நம்மைக் மேலும் கூர்மைப்படுத்தும் என்பதை மறந்துவிட்டு சமூக அரசியல் சார்ந்த விடயங்கள் மட்டுமே விழிப்புணர்வு என்று ஒருசாரார் கொடி பிடித்துக் கொண்டு நிற்கிறார்கள்.

ஆனால்.....

கழுகின் பார்வையில் வாழ்வியல் இயங்கு தன்மையின் எல்லா பாகங்களுமே விழிப்புணர்வு அடைய வேண்டியவையே. சமூக அரசியல் கடந்த வாழ்வியல்தான் சமூகத்திற்கும் அரசியலுக்கும், இன்ன பிற விடயங்களுக்கு எல்லாம் அடித்தளம் என்பதையும் நாம் தெளிவாக உணர்ந்தே இருக்கிறோம்.....!

வாழ்வியல் முரண்பாட்டு முடிச்சுக்களை இந்த ரங்கனின் ரிலாக்ஸ் பக்கங்கள் மென்மையாய் அவிழ்த்தெறியும் என்பது சர்வ நிச்சயம். இனி வார, வாரம் வெள்ளிக்கிழமை உங்கள் ரங்கா உங்களோடு இந்த பக்கத்தின் மூலம் தொடர்ந்து பேசுவார்...

சீரியஸ் சிகாமணிகள்

நான் தினமும் சாலைகளில் செல்லும் போதும், பொது இடங்களில் பலரை சந்திக்கும் போதும் ஒரு விஷயத்தை நன்றாக உணரமுடிகிறது. அதுதான் சீரியஸ்னெஸ். எல்லா வயதினருக்கும் இது இருப்பினும், குறிப்பாக 25 வயதிற்கு மேற்பட்ட மக்கள் அனைவருக்கும் இது ஒற்று தொற்றுவியாதி போல...

எதோ இவர்தான் உலகையே கைக்குள் வைத்திருப்பவர் போலவும், பேசியோ சிரித்தோவிட்டால் உலகம் உடைந்து உருக்குலைந்து போய்விடும் என்பதுபோல் ஜனங்கள் முகத்தை மிகவும் இறுக்கமாக வைத்துகொண்டே சுற்றி வருகின்றனர்.

இவர்கள் இறுக்கமடைய அடைய, மருந்து கம்பெனிகளும், மருத்துவர்களும், மனோதத்துவ நிபுணர்களும், போலி சாமியார்களும், கடவுள் வியாபாரிகளும் மகிழ்ச்சியில் சிரித்து கும்மாளமிடுகிறார்கள். இவர்கள் எந்த அளவுக்கு இறுக்கமடைந்து நோய்வாய்ப்படுகிறார்களோ, அந்த அளவு அவர்களுக்கு லாபம். முதலில் ஏன் எப்போதும் இறுக்கமாகவே இருக்க வேண்டும் என்று யோசிக்க வேண்டும்.

பிரச்சினைகள் என்பவை தனக்கு மட்டும்தான் இருக்கிறது, மீதி இருக்கும் அத்தனை பேரும் மிகவும் சந்தோசமாக இருப்பதாக ஒவ்வொரு மனிதனும் நினைக்கிறான். பிரச்சினை என்பது பொருளாதாரம் சம்பந்தப்பட்டது என்று நினைத்துக் கொண்டு பொருளினை சேர்த்து விட்டாலெல்லாப் பிரச்சினைகள் எல்லாம் தீர்ந்து விடும் என்பதற்காக பொருள் சேர்க்க ஓடிக் கொண்டே இருக்கிறார்கள், இது ஒரு பக்கம் என்றால் பொருளைச் சேர்த்து அதிகமாய் வைத்து இருப்பவர்களுக்கு இன்னமும் பயம் கூடிப் போய் அவர்களும் ஓடிக் கொண்டே இருக்கிறார்கள்......?

வாழ்வின் எல்லா நிலையிலும் இன்பமும் துன்பமும் ஒரு பேக்கேஜ் மாதிரி என்பதை கடைசி வரை யாரும் உணராமல் என்னமோ இந்த பூமியை இவர்கள் தலையில் தூக்கி வைத்துக் கொண்டு நகர்வது போல எப்போதும் டென்சனாகவும், சீரியசாகவும் இருக்கிறார்கள்.

ஒரு எளிய விஷயத்தை புரிந்துகொள்ளுங்கள். நாம், இந்த மனித இனம் மட்டுமே இந்த அகண்டப் பெருவெளிக்கு முக்கியமே இல்லை, இந்த சூரியக்குடும்பமொ, இல்லை இந்த சூரியனோ கூட இந்த பிரபஞ்சத்தில் முக்கியமானதில்லை. எல்லாம் வெறுமனே தூசுத்துகள்தான். இப்படி இவ்வளவு பெரிய சூரியனே முக்கியமில்லாத போது, நாமெல்லாம் எம்மாத்திரம்? ஏன் இந்த டென்ஷன்? ஏனிந்த கோபம்? ஏனிந்த கொலைவெறி? எதை நோக்கி இந்த வெறிகொண்ட ஓட்டம்?

நிதானியுங்கள்.. இந்த வாழ்க்கை வாழவே வழங்கப்பட்டது. வெற்றிகொள்ள இங்கே எதுவுமில்லை. வெறிகொள்ளவேண்டிய அவசியமே இல்லை. அறிவை திறந்து நிறைய செய்துவிட்டோம், இப்போது இதயத்திற்கு இறங்கி வருவோம்.

அறிவு மட்டுமே வாழ்க்கையானால், அடுத்த பத்தாண்டுகளில் அணுகுண்டுகள் நம்மை அழித்துவிடும். இன்னும் கொஞ்சநஞ்சம் ஒட்டிக்கொண்டிருக்கும் கருணையை, அன்பை, பாசத்தை, நட்பை, நகைச்சுவையை தூசி தட்டி எடுப்போம், அதை வளர்ப்போம், காப்போம்..!!

அன்பில் பூக்கும் புன்னகையோடு, எளியதுதான் வாழ்க்கை என்ற சிரிப்போடு, மகிழ்ச்சியோடு இக்கணம் நிம்மதியாய் வாழ்ந்துவிடுவோம்..நன்றி..!!

கழுகிற்காக
உங்கள் ரங்கா

(கழுகு இன்னும் உயரப் பறக்கும்....)

விழிப்புணர்வு என்னும் வெற்றிச் சிறகு....!

2011-12-20T21:49:00.006+05:30

வாழ்க்கையின் ஒவ்வொரு கணமும் அற்புதமானவை. சோகங்களும், சந்தோசங்களும் எப்போதும் நம்மைச் சமப்படுத்தியே அழைத்து செல்கின்றன என்ற உண்மையைப் பெரும்பாலும் மறந்து விட்டு சோகங்களின் அதிருப்திகளைச் சுமந்து கொண்டே வாழ்ந்து கொண்டிருக்கிறோம்.

ஒரு மழையைக் கண்டு தன்னின் ஆத்மா நிறைந்து சந்தோஷித்து திளைத்தவனும் இருக்கிறான். அதே மழையை வெறுத்து இது என்ன தொந்தரவு என்று வெறுப்பவனும் இருக்கிறான். ஒரு செயல் இரண்டு விதமான பார்வைகள். பார்வைகளை பிறப்பிக்கும் மூளைகளின் கற்பிதங்கள் தாம் இத்தகைய வேறுபட்ட எண்ணங்களை உருவாக்குகின்றன.

மனிதன் திறந்த மனதோடு எல்லாவற்றையும் வரவேற்கும் தன்மையோடு எப்போதும் இருக்க வேண்டும். மாறாக நமது சமுதாயத்தில் இப்போது எதிர்மறை மனோநிலையோடு வாழும் ஒரு வாழ்க்கை முறை நமக்குத் தெரியாமலேயே நமக்குள் புகுத்தி விடப்பட்டிருக்கிறது. இந்த உலகின் மிக எளிதான காரியமாக எதைச் சொல்வீர்கள் நீங்கள்?

இந்த உலகின் மிக எளிதான காரியம் என்பது " இல்லை " என்று சொல்வதும் " முடியாது " என்று மறுப்பதும்தான். ஒரு செயலை ஏற்று அதனை பொறுப்பு கொண்டு நகர்த்திச் செல்லும் போது அங்கே ஏதேனும் நாம் செயல் செய்ய வேண்டியிருக்கிறது. திட்டமிடல் அவசியப்பட்டு போகிறது. கூர்மை தேவைப்பட புத்தியை உலுக்கி விட்டு எப்போதும் விழிப்புணர்வோடு இருப்பது அவசியமாகிறது. உழைக்க வேண்டியிருக்கிறது.

ஆனால்..

" முடியாது " என்று ஒரு வார்த்தையை கூறிய பின்னால் அங்கே எந்த செயலும் நிகழ்வதில்லை. இப்போது கூட ஒரு விடயத்தை கயிற்றின் மீது நடப்பது போல விளங்க வேண்டுகிறேன். இயலாத காரியங்களை இயலாது என்று சொல்வதற்கு பார்வையின் தெளிவுகளை நம் சுயநலத்திற்கு அப்பாற்பட்டு செலுத்த வேண்டும். இதற்கும் ஒரு பயிற்சி தேவைப்படுகிறது.

எந்த ஒரு செயலையும் செய்யும் போது நான், நான் நான் மட்டுமே இதனால் பயன் பெறவேண்டும் என்ற ஒரு எண்ணமிருப்பின் அந்த செயலைச் செய்வதை விட நம்மை முன்னிலைப்படுத்துவதிலேயே நம் கவனம் அதிகமாக இருக்கும். நாம் முன்னிலைப் படவில்லை எனில் ஒட்டு மொத்த செயலையுமே நாம் விட்டு வெறுத்து ஒதுங்கி, "முடியாது" என்று சொல்லும் நிலைக்கு வந்து விடுவோம்.

வாழ்க்கை மிக அற்புதமானது அதை ஒரு அழகியல் தன்மையோடு நாம் தொடரவேண்டும். எப்போதும் இயங்கும் சராசரி நிகழ்வுகளை விடுத்து அவ்வப்போது குழந்தைகளாக நாம் மாறவேண்டிய அவசியம் இருக்கிறது. குழந்தைகள் போல அல்ல....குழந்தைகளாகவே என்ற வார்த்தை படிமத்தை கவனித்துக் கொள்ளுங்கள்.

வாழ்க்கை இவ்வளவு இறுகிப் போனதற்கு காரணம் நாம் எடுத்துக் கொண்டுள்ள நிலைப்பாடுகள், நம்மைச் சுற்றிப் பின்னப்பட்டிருக்கும் சம்பிரதாய வலைகள், மனோவசியக் கட்டுக்கள், என்பது உங்களுக்குத் தெரியுமா? இவை எல்லாம் காலம் காலமாக நம்மாலும் நமக்கு வழிகாட்டுகிறேன் என்று கூறி வழி கெடுத்தவர்களாலும் பின்னப்பட்டது என்பதை அறிக. இவற்றை எல்லாம் அறுத்தெரிந்து வெளியே வரும் போது தான் உண்மையான சத்திய வாழ்க்கை கிடைக்கும். இதை ஆன்மீகம் விடுதலை,முக்தி என்று கூறுகிறது.

எனது ஆச்சர்யம் என்ன தெரியுமா? உங்களை ஒரு சக்கர வாழ்க்கைக்குள் அடைத்துக் கொண்டு, நான் இப்படிப்பட்டவன், இப்படி வாழ்பவன், இந்தக் கட்சியை சேர்ந்தவன், இந்த சித்தாந்தம் கொண்டவன் இந்த ஊர்க்காரன், என்று ஓராயிரம் மனோவசியக் கட்டுக்களைப் போட்டுக் கொண்டு நீங்கள் சுதந்திரமானவர் என்று எந்த தார்மீக நியாயத்தில் கூவி கூவி அறிவிக்கிறீர்கள்?

ஒரு வித மாயக்கட்டுக்குள் இருந்து கொண்டு சுதந்திர புருசர்கள் என்று சொல்பவர்களைப் பார்த்தால் எனக்கு சிரிப்புதான் வருகிறது. வெறுமையாய் இருக்கும் மனிதன் தன் சூழலுக்கு ஏற்ப நியாயங்களைத் தேடுகிறான். அது " அ " வாய் இருந்தாலும் சரி " ஆ "வாய் இருந்தாலும் சரி அல்லது " இ " ஆய் இருந்தாலும் சரி....அதில் இருக்கும் நியாத்தை தேடி எடுத்துக் கொண்டு பேசும் சக்தி நமக்கு இருக்கிறதா? இப்படி ஒரு சுதந்திரமான மனிதனாய் வாழும் போது நீங்கள் எல்லாவற்றிலும் இருக்கும் நன்மைகளை எடுத்துக் கொண்டவர்கள் ஆவீர்கள் தானே?

சித்தாந்தங்களும் தத்துவங்களும் தோன்றியது மனித வாழ்க்கையை சீரமைக்கத்தான் அவைகளே இறுதி உண்மைகள் அல்ல. தன்னைச் சுற்றி நடக்கும் அநீதிகளைப் பற்றி ஒரு மனிதன் முதலில் உணர்ந்து, அது பற்றி சிந்தித்து ஏன் இந்த சூழல் எனக்கும் எம் மக்களுக்கும் என்று முதலில் நினைத்திருக்க வேண்டும். இது முழுக்க முழுக்க அவனின் விழிப்புணர்வு சரியாக இருக்கும் பட்சத்தில்தான் நடந்திருக்க வேண்டும். சித்தாந்தங்களும் தத்துவங்களும் பிறக்க ஒரு மனிதன் தன்னின் இருப்பை, சூழலை, சக மனிதரின் கஷ்ட நஷ்டங்களை உணர்ந்தவனாயிருக்க வேண்டும்.

தெளிவான சிந்தனைகளின் பிறப்பிடம் முழுமையான விழிப்புணர்வு என்று அறிக;

கட்டுக்கள் இல்லாத ஒரு வாழ்க்கை வாழும் போது நீங்களும் நானும் நாமாகவே இருக்கிறோம். தயவு செய்து எவரின் கருத்துக்களும் அத்து மீறி உங்களின் விழிப்புணர்வு நிலையை உடைத்துப் போட்டு உங்களுக்குள் ஊடுருவி உங்களின் மூளைகளை கட்டுப்படுத்த விடவே விடாதீர்கள்.

இயற்கையில் வாழ்க்கையும் வாழ்வின் ஓட்டமும் மிகத்தெளிவாய் சிக்கல் இல்லாததாய் இருக்கிறது, அதை மட்டுப்பட்டு நின்று மடங்கிப் போய் விடாமல், அகண்டு பரந்து விரிந்த வானில் நமது வெற்றிச் சிறகுகளை விரிப்போம்....! எல்லைகள் கடந்த முழுமையின் ஏகாந்தத்தில் எப்போதும் சந்தோஷித்து இருப்போம்.

உண்மைகளை வாங்கும் நமது பாத்திரத்தில் சத்தியங்களை நிரப்ப நமக்கு கோட்பாடுகள் எதற்கு? கொள்கை என்ற குறுகிய வட்டமெதற்கு...! ஒட்டு மொத்த பிரபஞ்ச நகர்வும் நமது கோட்பாடு....! ஒட்டு மொத்த மானுட நலமும் எமது கொள்கை என்ற உயரிய நோக்கோடு என்றென்றும் வெற்றி வானில் சிறகடித்துப் பறப்போம்...!

கழுகிற்காக
தேவா. S

(கழுகு இன்னும் உயரப்பறக்கும் )

மலையாளிகளை ஆட்டு மந்தைகளாக்கும் கேரள கேவல அரசியல்...! முல்லைப் பெரியாறு - ஒரு பார்வை!

2011-12-14T10:14:00.009+05:30

முல்லைப் பெரியாறு பற்றி முணு முணுக்காத மனிதர்களே தற்போது இருக்க முடியாது. தமிழக, மற்றும் கேரள மக்கள் அத்தனை பேரும் ஒரே நேரத்தில் தத்தம் கவனத்தை ஒட்டு மொத்தமாய் இன்று குவித்துப் போட்டிருக்கும் ஒரு இடம் முல்லைப் பெரியாறு. சர்வதேச எல்லைகளில் வேற்று நாட்டோடு எழும் பிரச்சினைகளை எல்லாம் நாம் சர்வ சாதாரணமாக எண்ணி கடந்து சென்று விடலாம்..

ஆனால்...

முல்லைப் பெரியாறு ஒரு இனம் இரண்டு மாநிலங்களாய் ஒரு தேசத்துக்குள் பிரிந்து நின்று ஒருவர் மீது ஒருவர் குற்றம் கூறிக் கொண்டு சண்டையிட்டுக் கொள்ளும் ஒரு விடயம். நாமெல்லாம் திராவிட இனம் என்று கூறும் ஒவ்வொரு அரசியல்வாதிகளும் இன்று நீ தமிழன், மலையாளி என்று இரண்டு மாநிலங்களிலும் வரிந்து கட்டிக் கொண்டு நிற்கிறார்கள்.

முல்லைப் பெரியாறு அணை உருவான வரலாறு, பென்னி குயிக் என்னும் ஒரு மனிதனின் தொலை நோக்குப் பார்வை, அணையின் தொழில் நுட்பவிடயங்கள் என்று போதும் போதுமெனும் அளவிற்கு பல கட்டுரைகளும், காணொளிகளும் வந்து விட்டன. கேரளாவிற்கு சென்ற தமிழர்களை அதுவும் குறிப்பாக பெண்களை கடுமையாக தாக்கி தகாத வார்த்தைகளை பேசி மலையாளிகள் இந்தப் பிரச்சினையை வன்முறைப் பாதைக்கு திருப்பி விட்டதன் மூலம் பிரச்சினையின் தீவிரம் இன்னமும் கூடிப்போயிருக்கிறது.

116 வருடங்களுக்கு முன்னதாக ஒரு வெள்ளைக்காரனின் மூளையில் உதித்த பச்சாதாபமும், மனிதநேயமும் இன்று சொந்த நாட்டில் அதுவும் தன் இனத்தைச் சேர்ந்த தான் சார்ந்து வாழும் தமிழக மக்கள் மீது மலையாளிகளுக்கு இல்லாமல் போனதற்கு காரணமாய் இந்திய அரசியல் சாக்கடை என்னும் சூட்சுமம் அமைந்து போய் விட்டது.

நீர்ப்பிடிப்பும், அணையும் நமது மாநிலத்தில் இருக்க இதன் பயன்பாடுகளை மிகையாய் நாம் அனுபவிக்காமல் அதை தமிழகத்துக்கு ஏன் கொடுக்க வேண்டும் என்றும், நமது தேவைக்குப் போக எஞ்சியிருப்பதை நாம் கொடுக்கலாம் என்றும், மலையாளிகளின் தலையில் முரண்பாட்டு சிந்தனைகள் கொம்புகளாய் முளைத்தன.

முல்லைப் பெரியாறு நீர்ப்பிடிப்பிலிருந்து மின்சார வளத்தைப் பெறுவதைத் தவிர வேறு எந்த வகையிலும் அந்த நீரால் கேரள மாநிலத்துக்கு பயன் கிடையாது என்பதை அந்த மாநில மக்கள் அறியாவண்ணம் புத்திகளை மறைத்து தமிழகத்திற்கு தண்ணீர் கொடுப்பதையும் கொடுக்காததையும் நாமே தீர்மானிக்கவேண்டும், அதை எப்படி எப்போதோ இருந்தவர்கள் தீர்மானிக்கலாம் என்ற சுயநல எண்ணங்கள் தோன்றியதின் விளைவாய், காரணங்களின்றி பிறந்த பேராசையே.....அணையின் நம்பகத்தன்மை பற்றி அவர்களைப் பேசச் சொன்னது.

கேரள மக்களிடம் தீவிர பொய்ப்பரப்புரைகளை செய்து வரும் ஊடகங்களுக்கு அது ஒரு வியாபாரம், அரசியல் நரிகளுக்கு தத்தம் கட்சிகளை மலையாள மண்ணில் ஊன்றிக் கொள்ள கிடைத்த ஒரு சந்தர்ப்பம்....

ஆனால்...

தங்கள் கட்டப் போகும் புதிய அணையால் தொழில் நுட்ப ரீதியாக எந்த வகையிலும் தமிழக வானம் பார்த்த பூமிகளில் வாழும் மக்களுக்கு உதவ முடியாது என்பதைப் பற்றியோ, புதிய அணையால் தென் தமிழ்நாடு சுடுகாடாய் மாறி மீண்டும் 1800களின் இறுதியில் ஏற்பட்ட பெரும் பஞ்சம் தலை விரித்து ஆடும் என்பது பற்றியோ சிந்திப்பார்க்க நேரமில்லாத அளவிற்கு மனிதம் மங்கிப்போய் இருப்பதை மலையாளிகளில் பலர் அறிந்திருக்கவில்லை.

கழுகின் கட்டுரைக்காய் பல்வேறு தரப்பட்ட மலையாளிகளிடம் நாம் உரையாடிய போது அவர்கள் திரும்பத் திரும்ப கூறிய விடயம் தண்ணீர் நாங்கள் கண்டிப்பாக கொடுப்போம், தமிழகம் ஏன் எங்களை நம்ப மறுக்கிறது..? நாமெல்லாம் ஒரு தாய்ப் பிள்ளைகள்தானே என்பன போன்ற கேள்விகள்தான்....

புதிய அணை கட்டினால் என்ன நிகழும்? அதன் விளைவுகளால் தமிழகம் எப்படி எல்லாம் பாதிக்கப்படும்? மேலும் நாளை அணையின் நிர்வாகம் கேரள அரசிடம் போன பின்பு, கேரள மக்களே நினைத்தாலும் தண்ணீர் கொடுக்க முடியாது, தமிழகம் வறண்டு போனால் அது கேரளாவை எப்படி பொருளாதர ரீதியாக பாதிக்கும் என்றெல்லாம் சில மலையாளிகளிடம் நாம் விளக்கிய போது அடுத்ததாய் அவர்கள் நம்மிடம் கேட்ட கேள்வி....

அணை உடைந்தால் எத்தனை உயிர்கள் போகும் என்று உங்களுக்குத் தெரியுமா? ஒரு சுண்ணாம்புக் கல்லில் கட்டிய அணையை எப்படி நீங்கள் நம்புகிறீர்கள்? கேரள அரசு ஐ.ஐ.டியை வைத்து ஆராய்ந்து பரிசோதனை செய்து பார்த்ததில் அணை எப்போது வேண்டுமானாலும் உடையலாம், கடுமையான நீர்க்கசிவு இருக்கிறது என்கிறார்களே என்பது போன்ற கேள்விகளையும் நம்மிடம் வைத்தனர்...

ஐ.ஐ.டியின் மூலம் கேரள அரசு அணையை பரிசோதித்து உண்மை, அது தனது அறிக்கையை கொடுத்ததும் உண்மை ஆனால் எதன் அடிப்படையில் அணை பலவீனமானது என்று கூறுகிறீர்கள்? தொழில் நுட்ப மற்றும்ம் விஞ்ஞானத்தின் அடிப்படையில் உங்களால் விளக்க முடியுமா என்று கேட்டால் அதற்கு அவர்களிடமிருந்து எந்த ஒரு ஆதாரப்பூர்வமான பதிலும் இல்லை என்ற உண்மையை நாம் பகின்ற போது தெளிவாக சிந்திக்கக் கூடிய மலையாளிகள் சிலர் வாயடைத்துதான் போனார்கள்!!!!???

அணையின் பலம் மற்றும் நம்பகத்தன்மை பற்றிய விபரத்தெளிவுகள் இல்லாமல் மலையாள சகோதரர்களை கேரள அரசியல் கட்சிகளும், வெற்றுப் புரட்டு வியாபார ஊடகங்களும் மிகப்பெரிய ஒரு போலி அச்ச மனோநிலைக்குத் தள்ளி விட்டு இருக்கின்றன. முல்லைப் பெரியாறு உடைந்து உயிருக்கும் உடைமைகளுக்கும் பாதிப்பு ஏற்படும் என்று ஏராளாமான அந்தப் பகுதி மக்கள் இரவில் உறங்குவதே கூட இல்லையாம்...

தமிழகத்துக்கு தண்ணீர் வேண்டும் என்ற கோரிக்கையைத்தான் எங்கள் அரசு சரி என்று ஒத்துக் கொள்கிறதே...புதிய அணை கட்டினால் என்ன? ஏன் எங்கள் உயிரோடு தமிழக அரசியல் கட்சிகளும், மக்களும் விளையாட வேண்டும் என்று அப்பாவி கேரள மக்கள் தமிழகத்தைப் பார்த்து கேட்குமளவிற்கு மிகப்பெரிய புரட்டு அரசியல் அங்கே நிகழ்ந்து கொண்டிருப்பதின் விளைவே....தமிழக கூலித் தொழிலாளிகளை கேரள மூர்க்கர்கள் கடுமையாகத் தாக்கியது.

இந்திய அரசையும், அதன் அரசியலையும் தாண்டி இன்று முல்லைப் பெரியாறு விவாகாரம் மிகப்பெரிய மக்கள் பிரச்சினையாய் வெடித்து இருக்கிறது. அணை உடைந்தால் நாங்கள் இறப்போம் என்று கேரளாவும்...நீங்கள் புதிய அணையைக் கட்டினால் போதிய தண்ணீரைக் கொடுக்காமல் எங்களை வஞ்சிப்பதின் மூலம் பஞ்சத்தால் நாங்கள் இறந்து போய் விடுவோம் என்று தமிழ் மக்களும்.. இன்று உணர்ச்சிக் கொந்தளிப்பாய் கோபத்தில் ஒருவரை ஒருவர் தாக்கி உயிருக்கும் உடைமைகளுக்கும் சேதங்களை விளைவித்துக் கொண்டிருக்கின்றனர்.

22 எம்.பிக்களை தன்னிடம் கொண்டிருக்கும் கேரளாவின் இந்திய ஆளுமைக்கு முன்னால் 40 எம்பிக்களையும், பல மந்திரிகளையும் வைத்திருக்கும் தமிழகம் ஒரு பிச்சைக்காரனைப் போலத்தான் இன்று நின்று கொண்டிருக்கிறது. மத்திய அரசோடு கூட்டு வைத்திருக்கும் தமிழக கட்சிகளும், மத்திய அரசில் அமைச்சர்களாக இருக்கும் தமிழகத்தைச் சேர்ந்த காங்கிரஸ் எம்பிக்களும்....வேற்று மாநிலத்தவர்கள் போட நடந்து கொள்ளும் ஒரு நயவஞ்சகப் போக்கினை நாம் இந்தருணத்தில் உணர்ந்து கொள்ள வேண்டும்.

அணையின் நம்பகத்தன்மையையும், அதன் வலுவினையும் ஏற்கெனவே கணித்து அணையில் நீரினை 142 அடிகள் தேக்கி வைத்துக் கொள்ளலாம் என்று உச்ச நீதிமன்றம் அறிவித்த அறிவிப்பினை கேரளா வேண்டுமென்றே புறக்கணித்து விட்டு வஞ்சகமாய் அணை பாதுக்காப்புக்கென்று கேரள சட்டசபையில் ஒரு சட்டம் இயற்றி அதன் மக்களை ஏமாற்றி, அணை வலுவில்லாதது என்று தொடர்ந்து பரப்புரை செய்யும் போக்கு வன்மையாகக் கண்டிப்படவேண்டிய ஒன்று...

தமிழக விவசாயிகளுக்கு தீங்கிழைக்கும் நோக்கோடு நடக்காமல், மத்திய அரசு இந்த விடயத்தில் பாரபட்சமின்றி நடந்து நியாயத்தின் பக்கம் நின்று, அணையின் வலுவினைப் பற்றி செவுட்டில் அறைந்தாற் போல கேரள அரசிடம் அறிவித்து தேவைப்பட்டால் மேலும் அணையை வலுவாக்க நடவடிக்கைகள் எடுப்பதோடு அணையை உடைத்தலையும், புதிய அணையைக் கட்டுதலையும் தனது இரும்புக் கரம் கொண்டு அடக்க வேண்டும்....

டிசம்பர் 21, மற்றும் 22 ஆம் தேதிகளில் முன்னாள் உச்ச நீதிமன்ற நீதிபதி ஏ.எஸ் ஆனந்த் தலமையில் அணையைப் பார்வையிட செல்லும் குழு நேர்மையான ஒரு அறிக்கையை வெளியிடும் என்று நாம் நம்பும் அதே வேளையில் அதை செயற்படுத்த கேரள அரசு மீண்டும் தயக்கங்கள் காட்டி தனது அரசியல் விளையாட்டுக்களை மத்திய ஆளும் காங்கிரஸ் அரசின் துணையோடு நடத்தத் தொடங்கினால்.....

தமிழகம் என்ற ஒரு மாநிலம் தடைகளை எல்லாம் உடைத்தெறிந்து ஒரு போராட்ட பூமியாய் மாறுவதை யாராலும் தடுக முடியாது என்பது நிதர்சனமான உண்மை.!!!!

கழுகிற்காக
தேவா. S

(கழுகு இன்னும் உயரப்பறக்கும்)

நவீன உலகின் பெற்றோர்களே....கவனியுங்கள்! ஒரு விழிப்புணர்வு பார்வை!

2011-12-12T10:39:00.005+05:30

இன்றைய காலகட்டத்தில் நமது நாட்டில் அதிக வேலை வாய்ப்புக்கள் இருக்கும்ஒரு துறையாக கணிணி சார் பணிகளே இருக்கின்றன. வன், மற்றும் மென்பொருள் வல்லுனர்களின் ஊதியங்களை கணக்கில் கொண்டு பார்த்தோமானால்அது மற்ற துறைகளில் இருப்பவர்களின் சம்பள விகிதகங்களோடு ஒப்பிட்டுபார்க்கவே முடியாத உயரத்தில்தான் இருக்கிறது.

இப்படியாக அதிக ஊதியம் பெறும் கணிணி சார்ந்து வேலை செய்பவர்களின்செலவிடும் வேகமும் வாங்கும் திறனும் தன்னிச்சையாக கூடித்தான்போகின்றன். இந்த வாங்கும் திறன் அதிகரிக்கும் போது அது எப்படி அவர்களின்குழந்தைகளைப் பாதிக்கிறது என்ற ஒரு பார்வையை இந்தக் கட்டுரையின் மூலம்பதிகிறோம்.

கட்டுரைக்குள் செல்வோமா ....!!!

இன்றைய கணிணி யுகம் இந்தியாவில் மிக அருமையாக வளர்ந்து கொண்டுஇருக்கிறது. குறிப்பாக தமிழகத்தில் இன்னும் பலமாக முன்னேறிவருகிறது. வன்-மென் பொறியாளர்களின் சம்பளம் வியக்க வைக்கும் அளவுக்கு
கிடைப்பது மிக்க மகிழ்ச்சிக்குரிய ஒரு விஷயம். குறிப்பாக இவர்கள் சிறுவயதிலேயே மிக பெரிய அந்தஸ்த்தை இதன் மூலம் அடைந்து விடுகிறார்கள்

நடுத்தர குடும்ப பெற்றோர்கள், ஒரு வீடு பைக்,கார், இன்னபிற வீட்டு உபயோகபொருட்களை அடைய எவ்வளவு காலத்தினை எடுத்துக்கொண்டார்கள்.. ??? அவர்களின் வாழ்க்கை தரம், மற்றும் காலத்தின் கட்டாயம் அந்த மாதிரி
இருந்தது...

முன்பெல்லாம் நாம் பெற்றோரிடம் சிறிய அளவிளான விளையாட்டு சாமான்வாங்க எவ்வளவு போராடுவோம்...அதுவும் கிடைத்தால் தான்போச்சு....இல்லையென்றால் அந்த ஆசை நிறைவேறாமலேயே போய் விடும். மற்ற பிள்ளைகளின் விளையாட்டு சாமான்களை ஏக்கத்தோடு பார்ப்போம். இந்தமாதிரி அனுபவம் நம்மில் பலருக்கும் ஏற்ப்பட்டிருக்கும் ...

போகட்டும் ....

இன்றைய கணிணி பொறியாளர்கள் மிக சிறிய வயதிலேயே எல்லாவசதிகளையும் பெற்று விடுகிறார்கள். திருமணத்திற்கு முன்பே வீடு,,கார்,,வங்கி சேமிப்பு ,,என்று எல்லாம்வாழ்க்கையில் ஒரு பொருளாதார மேம்பாட்டினை அடைந்து விடுகிறார்கள்.

பிறகு திருமணம், குழந்தைகள் ....

இங்க தாங்க நாம விஷயத்துக்கு வருகிறோம் ....

பெரும்பாலும் கணிணி பொறியாளர்களின் மனைவியரும் இதே துறையில்வேலைக்கு செல்பவர்களாக இருக்கிறார்கள்.
(அல்லது இல்லத்தரசிகளாகவும்,வேறு ஏதோ துறையைச் சேர்ந்தவர்களாக கூடஇருக்கலாம்)இவர்கள் குழந்தைகளை வளர்க்கும் முறை சற்றே கவலை அளிக்ககூடியதாக உள்ளது ....

தற்பொழுது இத்துறையில் பணி புரியும் நண்பர்கள் பணிச் சுமை காரணமாக - வீட்டில் குடும்பத்துடன் சேர்ந்து மகிழும் நேரம் குறைந்து விட்டது என்பதை நாம்அனைவரும் ஒத்துக் கொண்டே ஆக வேண்டும். அதனால் குழந்தைகளிடம் செலவழிக்கும் நேரமும் குறைந்து விட்டது. அதனால் குழந்தைகளின் விருப்புவெறுப்புகளைப் பற்றிச் சிந்திக்கும் நேரமும் குறைந்து விட்டது...

குழந்தைகளின் தேவைகள் பற்றிச் சிந்திக்க நேரமில்லாமல் அவர்கள் கேட்டதை, கேட்ட உடனேயும், கேட்பதற்கு மேலேயும் உடனேயே வாங்கிக் கொடுத்துவிடுகிறார்கள். குழந்தைகளின் மீது இருக்கும் பாசமும், தன்னிடம் இருக்கும்வாங்கும் திறனும் அதிக விலைகளைப் பற்றியெல்லாம் கவலைகள் கொள்ளவைப்பதில்லை.

இவர்களுக்கு இருக்கும் வேலை பளு மற்றும் மற்ற குறிக்கோள்கள் நோக்கியபயணத்தால், தங்களின் பாசத்தையும் அன்பினையும் தங்களின் குழந்தைகளுக்குகாட்ட அதிகமான செலவுகள் செய்து அவர்களுக்கு தேவையான பொருட்களைவாங்கிக் கொடுக்கவும் செய்கிறார்கள்.

இப்படி வளரும் குழந்தைகளின் மனநிலை எவ்வாறு இருக்கும்????

எல்லாமே எளிதாக கிடைக்கும் போது இந்த குழந்தைகள் என்ன நினைக்கும்???

இந்த குழந்தைகளிடம் போராட்ட குணம் இருக்குமா ???

மனோதத்துவரீதியாக யோசித்து பாருங்கள்....

மற்ற பிள்ளைகளோடு எந்த அளவுக்கு இவர்கள் போட்டி போட்டு வளர்வார்கள்???

போராட்ட மனப்பான்மை இல்லாமலே ஒரு தலைமுறை வளர்ந்து வருவதுகவலைக்குரிய ஒரு விசயம்தானே...?

இப்படியாக வளரும் பிள்ளைகளிடம் வாழ்க்கை பற்றிய ஒருவித அலட்சியமனப்பான்மை வந்துவிடுவதோடு, தன்னைச் சுற்றி இருக்கும் எதுவும் எளிதாய்கிடைத்து விடுமென்ற ஒரு மனோநிலை அவர்கல் அறியாமலேயே அவர்களின்ஆழ்மனதில் பதிந்தும் விடுகிறது. எதுவாக இருந்தாலும் நம் பெற்றோர்கள்பார்த்துக்கொள்வார்கள் என்ற ஒரு எண்ணம் மேலோங்கியே இருப்பதால், தங்களின் எல்லா தேவைகளுக்குமே பெற்றோரைச் சார்ந்தே அதுவும் சிறிய சிறியவிடயங்களுக்காக கூட எதிர்பார்த்து நிற்கும் ஒரு நிலையும் ஏற்படுகிறது.

எதிர்காலத்தில் இவர்களால் ஒரு சின்ன தோல்விய கூட தாங்கிக்கொள்ளமுடியாமல் மனதளவில் சுருண்டு விடுகிறார்கள்..இவர்கள் பெரியவர்கள் ஆனாபிறகு எந்த அளவிற்கு இந்த உலகத்துடன் போட்டி போடுவார்கள்??? கடுமையானபோட்டிகள் நிறைந்த இந்த உலகத்தில் போரட்டாக் குணம் இல்லாமல் எப்படிவெல்வது? சின்ன சின்ன தோல்விகளை எப்படி தாங்குவது. வெற்றிகள் எல்லாம்சுகமானவைதான் ஆனால் தோல்விகள்தானே மனிதனைப்பக்குவப்படுத்துகின்றன...?

அன்பர்களே, குழந்தைகளுக்கு அனைத்தும் செய்ய வேண்டியது நம் கடமை. இதில் இரு வேறு கருத்துக்கள் நமக்கு இல்லை, ஆனால் அதை ஒரு அளவோடுசெய்வதோடு கஷ்டப்படாமல் எதுவும் எளிதாக கிடைக்காது என்பதையும் புரியவையுங்கள்....

கஷ்டப்படாமல் கிடைக்கும் எதுவும் நிலைக்காது. வரும் காலம் கடும் போட்டிநிறைத்த காலம் நண்பர்களே...!!! நம் குழந்தைகளை போட்டி நிறைந்தஉலகத்துக்கு தயார் படுத்துங்கள் ....!

கழுகிற்காக
J.நக்கீரன்

(கழுகு இன்னும் உயரப் பறக்கும்)

பின் குறிப்பு: ஏன் கணிணிதுறையில் உள்ளவர்களின் குழந்தைகளை மட்டும்குறிப்பிட்டு சொல்கிறீர்கள் என்று நீங்கள கேட்பது புரிகிறது. மற்ற துறைகளில் பணிபுரிந்துஅதிக ஊதியம் வாங்குபவர்களின் வாழ்க்கையிலும் இந்த விஷயம் உண்டுதான்....

ஆனால் மிகையாக வேலை வாய்ப்புக்களும் அதிக ஊதியமும் கிடைப்பது கணிணித் துறையில்தான் என்பதால் கணிணித் துறையை மையமாக வைத்துகட்டுரை செய்துள்ளோம். மற்ற படி பிள்ளைகளுக்கு கேட்ட விலையைப் பற்றி கவலை கொள்ளாமல் உடனே உடனே அவர்களின் தேவைகளை நிறைவேற்றிக் கொடுக்கும் எல்லா பெற்றோர்களுக்கும், இந்தக்கட்டுரை பொருந்தும்.

அங்கன்வாடிக் கூடங்களின் இன்றைய நிலைமை....! ஒரு விழிப்புணர்வுப் பார்வை...!

2011-12-09T14:27:00.009+05:30

காலச்சக்கரத்தின் சுழற்சியில் எல்லாமே மாறி விட்டது. ஒரு காலத்தில் தனியார் ஆங்கில வழிக் கல்வி கற்கும் பள்ளிகளே இல்லாமலிருந்தது. எல்லா பிள்ளைகளும் அரசு பள்ளிகளைச் சார்ந்தே படிக்க வேண்டுமென்ற ஒரு சூழல் இருந்தது. தனியார் பள்ளிகள் மிகப்பெரிய நகரங்களில் அதுவும் வசதி படைத்தவர்கள் மட்டுமே பயிலும் ஒரு இடமாக இருந்தது.

இப்போது எல்லாமே மாறிப் போய் விட்டது. தடுக்கி விழுந்தால் ஆயிரம் ஆங்கிலப் பள்ளிகள். நடை, உடை, பாவனை எல்லாமே மாறிப் போன பல பிள்ளைகளைப் பார்த்து நமது பிள்ளைகளும் ஆங்கில வழிக் கல்வி கற்கச் சென்று இன்னும் நாகரீகமாய் இருக்க வேண்டும் என்ற பெற்றோர்களின் எதிர்பார்ப்புகள் தவறென்றும் கூற முடியாது. தனியார் பள்ளிகள் வளர்வதற்கு அரசுப் பள்ளிகளின் தரமும், சுற்றுப் புற சுகாதரமும், ஆசிரியர்கள் பிள்ளைகளை எதிர் கொள்ளும் விதமும் மிக முக்கிய காரணமாய் ஆகி இருந்தன.

ஒன்றாம் வகுப்பிலிருந்து பிள்ளைகள் பள்ளிக்கு செல்ல வேண்டும் என்ற நிலை மாறி எல்.கே.ஜி., யூ.கே.ஜி என்று படித்து பின் ஒன்றாம் வகுப்பிற்கு வரவேண்டும் என்ற ஒரு கட்டமைப்பினைப் பார்த்து அந்த வசீகரத்திலும் பிள்ளைகள் ஆங்கிலப் பள்ளிகளுக்குச் சென்றதும், மம்மி டாடி என்று பெற்றோர்களை அழைத்ததும், சாரி, தேங்க்ஸ் போன்ற வார்த்தைகள் சராசரியாய் சமுதாயத்திற்குள் நுழைந்து கொண்டதும் ஒரு மாதிரியான கலாச்சாரத்தின் நகர்வாய்த்தான் போனது.

இப்படியான ஒரு விரைவு ஓட்டத்தில் நாம் அனைவரும் மறந்து போன ஒரு இடம்தான் அங்கன் வாடிகள் எனப்படும் பாலர் பள்ளிகள். குழந்தைகள் சத்துணவு மையம் என்று வெளியில் ஒரு ஊதாக் நிறத்துப் பதாகையோடு ஒவ்வொரு ஊரிலும் ஒரு அரசு கட்டிடம் நம்மை வரவேற்காமல் இருந்ததில்லை. தற்காலத்தில் ப்ளே ஸ்கூல் மற்றும் பிரிகேஜி என்றெல்லாம கூறி எல்.கேஜிக்கு முன்னதாகவே பிள்ளைகளைக் கொன்டு சேர்க்கிறார்களே....அதுதான் பாலர் பள்ளி...!

பயில ஆரம்பிக்கும் முன்னரே குழந்தைகள் பெற்றோரை விட்டு விலகி வந்து தனித்திருந்து பயிலவும், சக குழந்தைகளோடு அமர்ந்து விளையாடி, ஆடிப் பாடி, அடித்து, அடி வாங்கி விட்டுக் கொடுத்து, கூடவே பாடங்களையும், மழலையர் பாடல்களையும் படித்து, சத்துணவு எனப்படும் உணவினை உண்டு பகிர்ந்து கொடுத்து ஒரு மாதிரியான சமூக வாழ்க்கைக்குத் தயார் செய்யும் இடங்களே இந்த அங்கன் வாடி என்னும் பாலர் பள்ளிகள்.

நவீனத்தின் நகர்வில் பண வசதி இருப்பவர்கள் இந்த அங்கன்வாடிகளை விட்டு நகர்ந்து தனியார் பிரிகேஜியிலும் க்ரீச் எனப்படும் தனிப்பட்ட குழந்தைகளைப் பாதுகாக்கும் நிறுவனங்களிடமும் தங்கள் குழந்தைகளை விட்டுச் செல்ல ஆரம்பித்தனர். காலச் சூழலில் ஆயிரம் பிரச்சினைகள் நம்மைச் சுற்றி முளைத்துக் கிடக்க நம்மில் பெரும்பாலான பேர்கள் இந்த அங்கன்வாடிகளைப் பற்றி மறந்தே போனோம்.

எவ்வளதான் சம்பள விகிதம் உயர்ந்திருந்தாலும் வாழ்க்கையின் தரம் இன்னும் சராசரிக்கு கீழாக இருக்கும் மனிதர்களுக்கு இன்னமும் இந்த அங்கன்வாடிகள் என்னும் பாலர் பள்ளிகள் ஒரு வரப்பிரசதம்தான். உழைத்து பெறும் பணத்தை வைத்து அடிப்படையான தேவைகளைக் கைக் கொன்டு சராசரி வாழ்க்கையை வாழ்வதே கடினம் என்ற நிலையில் இவர்கள் எப்படி தனியார் பள்ளிகளை நாடிச் செல்ல முடியும்...

அங்கன்வாடிகள் இன்று ஏழைக் குழந்தைகளின் இடமாக மாறியிருக்கிறது. இப்படி இருப்பதாலோ என்னவோ....இந்த மழலையர் பள்ளிக் கூடங்கள் கவனிப்பாராற்று சீரழிந்து கொன்டும் இருக்கிறது. எனது தேவைகளும், என்னைச் சுற்றி இருப்பவர்களின் பிரச்சினைகளுமே பிரச்சினை என்று நகர்ந்து கொண்டிருக்கும் சமகால மானூட சமூக இயங்கு நிலையில் வறுமைக்கோட்டிலும் அதற்கு கீழே இருப்பவர்களையும் யாரும் கண்டு கொள்வதில்லை. வறுமையில் இருப்பவனுக்கோ தன் வாழ்க்கைப் போரட்டத்தை கவனிகவே நேரமுமில்லை....

இதனாலேயே அங்கன்வாடிகள் இன்று ஒரு சுகாதரமற்ற ஒரு இடமாய், கவனிப்பாரற்றுக் கிடக்கிறது. இங்கே பிள்ளைகளுக்கு உணவளிக்கும் முறைகளும் அவர்கள் தங்கிப் பயிலும் கட்டிடங்களும் கேட்பாரற்றுக் கிடக்கிறது. இங்கொன்றும் அங்கொன்றுமாய் ஏதேனும் சில அங்கன்வாடிகள் சிறப்பாக செயல்படலாம் என்றாலும் மிகைகளின் நிலைமை மிகவும் கேவலமாய் இருப்பது புரையோடிப் போன ஒரு சமுதாயத்தின் விழுமியங்களாய் இன்னமும் இருக்கத்தான் செய்கின்றன.

சரியான பணியாளர்களை நியமித்து, இந்த அங்கன்வாடிகளை சுகாதாரமான முறையில் பராமரித்து, குழந்தைகளை சரியான முறையில் வழி நடத்திச்செல்ல வேண்டியது அரசின் கடமை. இதற்கு ஒத்துழைப்பு கொடுக்க வேண்டியது மக்களின் கடமை. பிள்ளைகள் பிஞ்சுகளாய் தங்களின் வாழ்க்கையில் முதற்கண் வெளி வந்து பயிலத்தொடங்கும் இடம் பூ பூக்கும் ஒரு நந்தவனமாய் இருக்க வேண்டும்....அங்கே நம்பிக்கையும், அறிவும் துளிர் விட வேண்டும் ஆனால் நடைமுறைகள் அப்படியானதாக இல்லை என்பது வருத்தத்திற்குரிய செய்தி.

கழுகின் சார்பாக நாம் விசிட் செய்த ஒரு அங்கன் வாடியின் (சில கரணங்களுக்காக பெயர் குறிப்பிடப்படவில்லை...) சில புகைப்படங்களையும், காணொளியையும் இங்கே இணைத்திருக்கிறோம்...! இதன் சுற்றுப் புறம் நம்மை திடுக்கிடச் செய்வதோடு....இதற்கான தீர்வுகளை அரசு செய்யுமா என்ற ஒரு கேள்வியையும் பலமாக எழுப்பாமல் இல்லை...!

கட்டுரையை வாசிக்கும் நண்பர்கள், தங்களின் அருகாமையிலிருக்கும் அங்கன் வாடிகளின் நிலைமையினை கண்டு புகைப்படங்களோடு அதன் தேவைகளை கழுகின் மின்னஞ்சலுக்கு அனுப்பி வைக்கவும். தமிழகம் முழுதும் இப்ப பழுதான நிலையிருக்கும் அங்கன்வாடிகளை அரசின் கவனத்திற்கு கொண்டு வர நாங்கள் எடுக்கப் போகும் நடவடிக்கைக்கு அது சர்வ நிச்சயமாய் உதவியாயிருக்கும்...!

கழுகிற்காக
கருத்தாக்கம்: மகேஷ்வரி

(கழுகு இன்னும் உயரப் பறக்கும்)

' கனவுக்கு செயல் கொடுப்போம் ' பேட்டி தொடர்ச்சி....

2011-12-06T10:31:00.015+05:30

நேற்றைய பேட்டியின் தொடர்ச்சி....

உங்களின் எதிர்கால திட்டம் என்ன?

தமிழ் நாட்டில் பள்ளி மற்றும் கல்லூரி மாணவர்களை சமுக சேவையில் ஆர்வத்தை தோற்றுவிப்பது , ஈடுபட செய்வது , மாணவர்களிடம் ஒற்றுமை உணர்வை வளர்ப்பது, கிராமங்களில் கணினி புரட்சி ஏற்படுத்துவது.

நீங்கள் எதிர்நோக்கும் பிரச்சினைகள் என்ன?

பிரச்சனைகள் என்பதை விட விமர்சனங்கள் , குறை சொல்வது என்பதே அதிகம். அவை இல்லாமல் வாழ்க்கையே இல்லையே , விமர்சனங்கள் , குறை சொல்வது பற்றி அஞ்சுவதில்லை , கவலைபடுவதில்லை , நாங்கள் செய்யும் நல்ல செயல்களில் மட்டும் நம்பிக்கை வைத்து செயல்படுகிறோம்

பயனாளிகளைப் பற்றி எப்படி அறிகிறீர்கள்?

முகநூல் நண்பர்கள், நண்பர்கள், மூலம் கனவுக்கு செயல் கொடுப்போம் அமைப்புக்கு பரிந்துரை செய்வார்கள்,அவர்கள் கோரிகையை கனவுக்கு செயல் கொடுப்போம் அமைப்பு பரிசீலனை செய்யும் .

எந்த அடிப்படையில்உங்களின் உதவிகளைச் செய்கிறீர்கள்? எதிர்காலத்தில் அவர்கள் தங்களிடம் உதவி கேட்க கூடாது என்ற அல்லது ஒருவருக்கு காலம் முழுவதும் உதவும் எண்ணமா?

நன்றாக படிக்கும் பள்ளி - கல்லூரி மாணவர்கள் -மாணவிகளுக்கு மட்டும் உதவுவோம். அவர்கள் கல்வி தரம் தொடர்ந்து கவனிப்போம். அவர்கள் கல்விக்கு மட்டும் உதவாமல், அவர்களுக்கு பகுதி நேரத்தில் எப்படி சம்பாதிப்பது, சுய தொழில் பயிற்சி தருவோம் , பகுதி நேர வேலை பெற்று தருவோம். அதன் மூலம் அவர்கள் அடுத்த வருட கல்வி கட்டணத்தை கட்ட முடியும்.

ஹச்.ஐ.வி பாதிக்கப்பட்ட ஏழை குழந்தைகள் மற்றும் (வேலைக்கு செல்ல முடியாமல் நிலையில் உள்ள ) மக்களுக்கு மட்டும் காலம் முழுவதும் உதவுவோம்.

வங்கி கடன் தெரியாத கிராமத்து பள்ளி - கல்லூரி மாணவர்கள் -மாணவிகளுக்கு வங்கி கல்விகடன் பற்றி வகுப்பு எடுப்போம், வங்கி கல்வி கடன் விண்ணப்பதை நிராகரிக்கும் வங்கிக்கு சென்று அதிகாரிகளிடம் பேசி ஏழை மாணவர்கள் -மாணவிகளுக்கு வங்கி கல்விகடன் பெற்று தருவோம்

சம கால இளைஞர்களுக்கு நீங்கள் என்ன சொல்ல விரும்புகிறீர்கள்?

இளைஞர்கள் இணையத்தை சரியாக பயன்படுத்த வேண்டும், இணையத்தில் எத்தனையோ நல்ல வாய்ப்புகள் உள்ளன , இணையத்தில் வெட்டி அரட்டை, செய்வதை விட்டுவிட்டு பயனுள்ளதாக சிந்தித்தால் நிறைய சாதிக்கலாம் . நம் நாட்டிலும் ஆயிரம் பில்கேட்ஸ், ஸ்டீவ் ஜாப்ஸ் உருவாகலாம்

இந்த விசயத்தில் யார் உங்கள் ரோல் மாடல்?

அன்னை தெரேசா,

நம் சமூகம் எத்தகைய ஒன்றாக இருக்க வேண்டும் என்று எதிர்பார்க்கிறீர்கள்?

ஊழலற்ற , லஞ்சமற்ற சமுகமாக , மக்கள் ஒற்றுமையுடன் இருக்க வேண்டும் என்பதே என் எண்ணம்

ஆதரவற்றவர்களைக் கண்டு பேசும் போது அவர்களின் மனோநிலை எப்படியிருக்கும்?

ஆதரவற்றகளுடன் பேசும்போது , நான் அவர்களிடம் சொல்லும் முதல் கோரிக்கை, என்னை உங்கள் நண்பனாக, சகோதரனாக பாருங்கள் என்று, அவர்களிடம் மனம் விட்டு பேசுவேன், பொறுமையாக அவர்கள் சொல்வதை கேட்பேன். குழந்தைகளிடம் பேசும் போது குழந்தையாக மாறி அவர்களிடம் பேசுவோம். குழந்தைகள் எங்களை அவர்கள் குடும்பத்தில் ஒருவராக தான் பார்க்கிறார்கள்.

இது போன்ற சமூக சேவைகளுக்கு கண்டிப்பாக ஒரு பெரிய தொகை தேவை படும் , உங்களால் அந்த தேவையை பூர்த்தி செய்ய முடிகிறதா ?

கண்டிப்பாக தேவை படும், பலநேரங்களில் ஏழை மாணவர்களின் தேவையை பூர்த்தி செய்ய முடியவில்லை என்பதே கவலை அளிக்கும் விசயம் , அதே நேரத்தில் நாங்கள் அனாவசியமாக நிதி வாங்குவதில்லை(கல்வி கோரிக்கை இல்லாத நேரத்தில் / உதவி தேவை படாத நேரத்தில் ) , தேவைக்கு மேல் ஒரு ரூபாய் அதிகம் கூட நிதி வாங்குவதில்லை, ஏழை மாணவர்களின் கல்வி கோரிக்கை பரிசிலிக்கபட்டு முகநூலில் சுவற்றில் போடப்படும், நண்பர்களின் மின்னஞ்சல்களுக்கு அனுப்பபடும் , அதை பார்த்து விருப்பம் இருப்பவர்கள் உதவுவார்கள் ,

நான் தொண்ணூறு சதவிதம் பணம் இல்லாமல் சேவை செய்கிறோம், அனாதை இல்லத்தில் டியூஷன் எடுப்பது, கணினி வகுப்பு எடுப்பது, தற்கொலை எண்ணம் கொண்டோருக்கு கவுன்செலிங் தருவது, ஹச், ஐ , வி - எய்ட்ஸ் விழிப்புணர்வு, பள்ளி படிப்பு முடிதோருக்கு உயர்கல்விக்கு வழி காட்டுவது, முதலியன.

கனவுக்கு செயல் கொடுப்போம் குழு

சபரியோடான பேட்டி முடிந்து விட்டது, ஆனால் ஆழமான அதிர்வுகளை சபரி நமக்குள் உருவாக்கி இருப்பதை தவிர்க்க முடியவில்லை. இணயத்தளத்தில் தனது முழு பங்களிப்பினை எமது கழுகு விழிப்புணர்வு வலைத்தளத்திற்கு அவர் அளிப்பதாக உறுதியளித்த போது அவரது வார்த்தைகளுக்குப் பின் இருந்த ஆழமான சமூக நல் நோக்கு எத்தகையது என்பதை உணர முடிந்தது.

சமூக சேவை என்பது பொருள் உதவி மட்டுமல்ல நமது அறிவையும், கல்வியையும், அனுபவத்தையும் பகிர்வது என்பதை செம்மையா உணர்ந்து அதை செயல்படுத்தி வரும் சபரி சங்கருக்கு கழுகின் பாரட்டுக்களை தெரிவித்துக் கொள்வதோடு...

சபரியும் அவரது கனவுக்கு செயல் கொடுப்போம் குழுவும் வெறுமனே அறியப்பட வேண்டியவர்கள் மட்டுமல்ல சர்வ நிச்சயமாய் பின்பற்றப்பட வேண்டியவர்களே என்பதை உங்களோடு பகிர்ந்து, எம் தேசத்து ஒவ்வொரு இளையரும் இப்படியான உணர்வினைக் கொண்டிருந்தால் இந்த தேசம் திருவாளர் அப்துல்கலாம் சொன்னது போல 2020ல் அல்ல அதற்கு முன்னரே ஒரு வலுவான வல்லரசாக மிளிரத்தான் செய்யும்...!

கேள்வி வடிவமைப்பு: கழுகு விவாதக் குழு

(கழுகு இன்னும் உயரப் பறக்கும்)